Allepo, Psalms, Chapter 139

Psa 139:1 א  למנצח לדוד מזמור יהוה חקרתני    ותדע
Psa 139:2 ב  אתה ידעת שבתי וקומי    בנתה לרעי מרחוק
Psa 139:3 ג  ארחי ורבעי זרית    וכל-דרכי הסכנתה
Psa 139:4 ד  כי אין מלה בלשוני    הן יהוה ידעת כלה
Psa 139:5 ה  אחור וקדם צרתני    ותשת עלי כפכה
Psa 139:6 ו  פלאיה (פליאה) דעת ממני    נשגבה לא-אוכל לה
Psa 139:7 ז  אנה אלך מרוחך    ואנה מפניך אברח
Psa 139:8 ח  אם אסק שמים שם אתה    ואציעה שאול הנך
Psa 139:9 ט  אשא כנפי-שחר    אשכנה באחרית ים
Psa 139:10 י  גם-שם ידך תנחני    ותאחזני ימינך
Psa 139:11 יא  ואמר אך-חשך ישופני    ולילה אור בעדני
Psa 139:12 יב  גם-חשך    לא-יחשיך ממך ולילה כיום יאיר--    כחשיכה כאורה
Psa 139:13 יג  כי-אתה קנית כליתי    תסכני בבטן אמי
Psa 139:14 יד  אודך--    על כי נוראות נפליתי נפלאים מעשיך    ונפשי ידעת מאד
Psa 139:15 טו  לא-נכחד עצמי    ממך אשר-עשיתי בסתר    רקמתי בתחתיות ארץ
Psa 139:16 טז  גלמי ראו עיניך    ועל-ספרך כלם יכתבו ימים יצרו    ולא (ולו) אחד בהם
Psa 139:17 יז  ולי--מה-יקרו רעיך אל    מה עצמו ראשיהם
Psa 139:18 יח  אספרם מחול ירבון    הקיצתי ועודי עמך
Psa 139:19 יט  אם-תקטל אלוה רשע    ואנשי דמים סורו מני
Psa 139:20 כ  אשר ימרוך למזמה    נשוא לשוא עריך
Psa 139:21 כא  הלוא-משנאיך יהוה אשנא    ובתקוממיך אתקוטט
Psa 139:22 כב  תכלית שנאה שנאתים    לאויבים היו לי
Psa 139:23 כג  חקרני אל ודע לבבי    בחנני ודע שרעפי
Psa 139:24 כד  וראה אם-דרך-עצב בי    ונחני בדרך עולם