Allepo, Psalms, Chapter 132

Psa 132:1 א  שיר המעלות זכור-יהוה לדוד--    את כל-ענותו
Psa 132:2 ב  אשר נשבע ליהוה    נדר לאביר יעקב
Psa 132:3 ג  אם-אבא באהל ביתי    אם-אעלה על-ערש יצועי
Psa 132:4 ד  אם אתן שנת לעיני    לעפעפי תנומה
Psa 132:5 ה  עד-אמצא מקום ליהוה    משכנות לאביר יעקב
Psa 132:6 ו  הנה-שמענוה באפרתה    מצאנוה בשדי-יער
Psa 132:7 ז  נבואה למשכנותיו    נשתחוה להדם רגליו
Psa 132:8 ח  קומה יהוה למנוחתך    אתה וארון עזך
Psa 132:9 ט  כהניך ילבשו-צדק    וחסידיך ירננו
Psa 132:10 י  בעבור דוד עבדך--    אל-תשב פני משיחך
Psa 132:11 יא  נשבע-יהוה לדוד אמת--    לא-ישוב ממנה מפרי בטנך--    אשית לכסא-לך
Psa 132:12 יב  אם-ישמרו בניך בריתי--    ועדתי זו אלמדם גם-בניהם עדי-עד--    ישבו לכסא-לך
Psa 132:13 יג  כי-בחר יהוה בציון    אוה למושב לו
Psa 132:14 יד  זאת-מנוחתי עדי-עד    פה-אשב כי אותיה
Psa 132:15 טו  צידה ברך אברך    אביוניה אשביע לחם
Psa 132:16 טז  וכהניה אלביש ישע    וחסידיה רנן ירננו
Psa 132:17 יז  שם אצמיח קרן לדוד    ערכתי נר למשיחי
Psa 132:18 יח  אויביו אלביש בשת    ועליו יציץ נזרו