Allepo, Psalms, Chapter 115

Psa 115:1 א  לא לנו יהוה לא-לנו    כי-לשמך תן כבוד--על-חסדך על-אמתך
Psa 115:2 ב  למה יאמרו הגוים    איה-נא אלהיהם
Psa 115:3 ג  ואלהינו בשמים--    כל אשר-חפץ עשה
Psa 115:4 ד  עצביהם כסף וזהב    מעשה ידי אדם
Psa 115:5 ה  פה-להם ולא ידברו    עינים להם ולא יראו
Psa 115:6 ו  אזנים להם ולא ישמעו    אף להם ולא יריחון
Psa 115:7 ז  ידיהם ולא ימישון--רגליהם ולא יהלכו    לא-יהגו בגרונם
Psa 115:8 ח  כמוהם יהיו עשיהם--    כל אשר-בטח בהם
Psa 115:9 ט  ישראל בטח ביהוה    עזרם ומגנם הוא
Psa 115:10 י  בית אהרן בטחו ביהוה    עזרם ומגנם הוא
Psa 115:11 יא  יראי יהוה בטחו ביהוה    עזרם ומגנם הוא
Psa 115:12 יב  יהוה    זכרנו יברך יברך את-בית ישראל    יברך את-בית אהרן
Psa 115:13 יג  יברך יראי יהוה--    הקטנים עם-הגדלים
Psa 115:14 יד  יסף יהוה עליכם    עליכם ועל בניכם
Psa 115:15 טו  ברוכים אתם ליהוה--    עשה שמים וארץ
Psa 115:16 טז  השמים שמים ליהוה    והארץ נתן לבני-אדם
Psa 115:17 יז  לא המתים יהללו-יה    ולא כל-ירדי דומה
Psa 115:18 יח  ואנחנו נברך יה--    מעתה ועד-עולם הללו-יה