Psa 107:1 א  הדו ליהוה כי-טוב    כי לעולם חסדו
Psa 107:2 ב  יאמרו גאולי יהוה--    אשר גאלם מיד-צר
Psa 107:3 ג  ומארצות קבצם    ממזרח וממערב מצפון ומים
Psa 107:4 ד  תעו במדבר בישימון דרך    עיר מושב לא מצאו
Psa 107:5 ה  רעבים גם-צמאים--    נפשם בהם תתעטף
Psa 107:6 ו  ויצעקו אל-יהוה בצר להם    ממצוקותיהם יצילם
Psa 107:7 ז  וידריכם בדרך ישרה--    ללכת אל-עיר מושב
Psa 107:8 ח  יודו ליהוה חסדו    ונפלאותיו לבני אדם
Psa 107:9 ט  כי-השביע נפש שקקה    ונפש רעבה מלא-טוב
Psa 107:10 י  ישבי חשך וצלמות    אסירי עני וברזל
Psa 107:11 יא  כי-המרו אמרי-אל    ועצת עליון נאצו
Psa 107:12 יב  ויכנע בעמל לבם    כשלו ואין עזר
Psa 107:13 יג  ויזעקו אל-יהוה בצר להם    ממצקותיהם יושיעם
Psa 107:14 יד  יוציאם מחשך וצלמות    ומוסרותיהם ינתק
Psa 107:15 טו  יודו ליהוה חסדו    ונפלאותיו לבני אדם
Psa 107:16 טז  כי-שבר דלתות נחשת    ובריחי ברזל גדע
Psa 107:17 יז  אולים מדרך פשעם    ומעונתיהם יתענו
Psa 107:18 יח  כל-אכל תתעב נפשם    ויגיעו עד-שערי מות
Psa 107:19 יט  ויזעקו אל-יהוה בצר להם    ממצקותיהם יושיעם
Psa 107:20 כ  ישלח דברו וירפאם    וימלט משחיתותם
Psa 107:21 כא  יודו ליהוה חסדו    ונפלאותיו לבני אדם
Psa 107:22 כב  ויזבחו זבחי תודה    ויספרו מעשיו ברנה
Psa 107:23 כג ]  יורדי הים באניות    עשי מלאכה במים רבים
Psa 107:24 כד ]  המה ראו מעשי יהוה    ונפלאותיו במצולה
Psa 107:25 כה ]  ויאמר--ויעמד רוח סערה    ותרומם גליו
Psa 107:26 כו ]  יעלו שמים ירדו תהומות    נפשם ברעה תתמוגג
Psa 107:27 כז ]  יחוגו וינועו כשכור    וכל-חכמתם תתבלע
Psa 107:28 כח ]  ויצעקו אל-יהוה בצר להם    וממצוקתיהם יוציאם
Psa 107:29 כט  יקם סערה לדממה    ויחשו גליהם
Psa 107:30 ל  וישמחו כי-ישתקו    וינחם אל-מחוז חפצם
Psa 107:31 לא  יודו ליהוה חסדו    ונפלאותיו לבני אדם
Psa 107:32 לב  וירוממוהו בקהל-עם    ובמושב זקנים יהללוהו
Psa 107:33 לג  ישם נהרות למדבר    ומצאי מים לצמאון
Psa 107:34 לד  ארץ פרי למלחה    מרעת יושבי בה
Psa 107:35 לה  ישם מדבר לאגם-מים    וארץ ציה למצאי מים
Psa 107:36 לו  ויושב שם רעבים    ויכוננו עיר מושב
Psa 107:37 לז  ויזרעו שדות ויטעו כרמים    ויעשו פרי תבואה
Psa 107:38 לח  ויברכם וירבו מאד    ובהמתם לא ימעיט
Psa 107:39 לט  וימעטו וישחו--    מעצר רעה ויגון
Psa 107:40 מ  ]  שפך בוז על-נדיבים    ויתעם בתהו לא-דרך
Psa 107:41 מא  וישגב אביון מעוני    וישם כצאן משפחות
Psa 107:42 מב  יראו ישרים וישמחו    וכל-עולה קפצה פיה
Psa 107:43 מג  מי-חכם וישמר-אלה    ויתבוננו חסדי יהוה