Psa 106:1 א  הללו-יה הודו ליהוה כי-טוב--    כי לעולם חסדו
Psa 106:2 ב  מי--ימלל גבורות יהוה    ישמיע כל-תהלתו
Psa 106:3 ג  אשרי שמרי משפט    עשה צדקה בכל-עת
Psa 106:4 ד  זכרני יהוה ברצון עמך    פקדני בישועתך
Psa 106:5 ה  לראות בטובת בחיריך--    לשמח בשמחת גויך להתהלל    עם-נחלתך
Psa 106:6 ו  חטאנו עם-אבותינו    העוינו הרשענו
Psa 106:7 ז  אבותינו במצרים    לא-השכילו נפלאותיך-- לא זכרו    את-רב חסדיך וימרו על-ים    בים-סוף
Psa 106:8 ח  ויושיעם למען שמו--    להודיע את-גבורתו
Psa 106:9 ט  ויגער בים-סוף ויחרב    ויוליכם בתהמות כמדבר
Psa 106:10 י  ויושיעם מיד שונא    ויגאלם מיד אויב
Psa 106:11 יא  ויכסו-מים צריהם    אחד מהם לא נותר
Psa 106:12 יב  ויאמינו בדבריו    ישירו תהלתו
Psa 106:13 יג  מהרו שכחו מעשיו    לא-חכו לעצתו
Psa 106:14 יד  ויתאוו תאוה במדבר    וינסו-אל בישימון
Psa 106:15 טו  ויתן להם שאלתם    וישלח רזון בנפשם
Psa 106:16 טז  ויקנאו למשה במחנה    לאהרן קדוש יהוה
Psa 106:17 יז  תפתח-ארץ ותבלע דתן    ותכס על-עדת אבירם
Psa 106:18 יח  ותבער-אש בעדתם    להבה תלהט רשעים
Psa 106:19 יט  יעשו-עגל בחרב    וישתחוו למסכה
Psa 106:20 כ  וימירו את-כבודם    בתבנית שור אכל עשב
Psa 106:21 כא  שכחו אל מושיעם--    עשה גדלות במצרים
Psa 106:22 כב  נפלאות בארץ חם    נוראות על-ים-סוף
Psa 106:23 כג  ויאמר    להשמידם לולי משה בחירו--    עמד בפרץ לפניו להשיב חמתו    מהשחית
Psa 106:24 כד  וימאסו בארץ חמדה    לא-האמינו לדברו
Psa 106:25 כה  וירגנו באהליהם    לא שמעו בקול יהוה
Psa 106:26 כו  וישא ידו להם--    להפיל אותם במדבר
Psa 106:27 כז  ולהפיל זרעם בגוים    ולזרותם בארצות
Psa 106:28 כח  ויצמדו לבעל פעור    ויאכלו זבחי מתים
Psa 106:29 כט  ויכעיסו במעלליהם    ותפרץ-בם מגפה
Psa 106:30 ל  ויעמד פינחס ויפלל    ותעצר המגפה
Psa 106:31 לא  ותחשב לו לצדקה    לדר ודר עד-עולם
Psa 106:32 לב  ויקציפו על-מי מריבה    וירע למשה בעבורם
Psa 106:33 לג  כי-המרו את-רוחו    ויבטא בשפתיו
Psa 106:34 לד  לא-השמידו את-העמים--    אשר אמר יהוה להם
Psa 106:35 לה  ויתערבו בגוים    וילמדו מעשיהם
Psa 106:36 לו  ויעבדו את-עצביהם    ויהיו להם למוקש
Psa 106:37 לז  ויזבחו את-בניהם ואת-בנותיהם--    לשדים
Psa 106:38 לח  וישפכו דם נקי דם-בניהם ובנותיהם--    אשר זבחו לעצבי כנען ותחנף הארץ    בדמים
Psa 106:39 לט  ויטמאו במעשיהם    ויזנו במעלליהם
Psa 106:40 מ  ויחר-אף יהוה בעמו    ויתעב את-נחלתו
Psa 106:41 מא  ויתנם ביד-גוים    וימשלו בהם שנאיהם
Psa 106:42 מב  וילחצום אויביהם    ויכנעו תחת ידם
Psa 106:43 מג  פעמים רבות    יצילם והמה ימרו בעצתם    וימכו בעונם
Psa 106:44 מד  וירא בצר להם--    בשמעו את-רנתם
Psa 106:45 מה  ויזכר להם בריתו    וינחם כרב חסדו
Psa 106:46 מו  ויתן אותם לרחמים--    לפני כל-שוביהם
Psa 106:47 מז  הושיענו יהוה אלהינו    וקבצנו מן-הגוים להדות לשם קדשך    להשתבח בתהלתך
Psa 106:48 מח  ברוך יהוה אלהי ישראל    מן-העולם ועד העולם-- ואמר כל-העם    אמן הללו-יה