Psa 99:1 א  יהוה מלך ירגזו עמים    ישב כרובים תנוט הארץ
Psa 99:2 ב  יהוה בציון גדול    ורם הוא על-כל-העמים
Psa 99:3 ג  יודו שמך גדול ונורא    קדוש הוא
Psa 99:4 ד  ועז מלך    משפט אהב אתה כוננת מישרים    משפט וצדקה ביעקב אתה עשית
Psa 99:5 ה  רוממו יהוה אלהינו והשתחוו להדם רגליו    קדוש הוא
Psa 99:6 ו  משה ואהרן בכהניו    ושמואל בקראי שמו קראים אל-יהוה    והוא יענם
Psa 99:7 ז  בעמוד ענן ידבר אליהם    שמרו עדתיו וחק נתן-למו
Psa 99:8 ח  יהוה אלהינו    אתה עניתם אל נשא היית להם    ונקם על-עלילותם
Psa 99:9 ט  רוממו יהוה אלהינו    והשתחוו להר קדשו כי-קדוש    יהוה אלהינו