Psa 96:1 א  שירו ליהוה שיר חדש    שירו ליהוה כל-הארץ
Psa 96:2 ב  שירו ליהוה ברכו שמו    בשרו מיום-ליום ישועתו
Psa 96:3 ג  ספרו בגוים כבודו    בכל-העמים נפלאותיו
Psa 96:4 ד  כי גדול יהוה ומהלל מאד    נורא הוא על-כל-אלהים
Psa 96:5 ה  כי כל-אלהי העמים אלילים    ויהוה שמים עשה
Psa 96:6 ו  הוד-והדר לפניו    עז ותפארת במקדשו
Psa 96:7 ז  הבו ליהוה משפחות עמים    הבו ליהוה כבוד ועז
Psa 96:8 ח  הבו ליהוה כבוד שמו    שאו-מנחה ובאו לחצרותיו
Psa 96:9 ט  השתחוו ליהוה בהדרת-קדש    חילו מפניו כל-הארץ
Psa 96:10 י  אמרו בגוים יהוה מלך--    אף-תכון תבל בל-תמוט ידין עמים    במישרים
Psa 96:11 יא  ישמחו השמים ותגל הארץ    ירעם הים ומלאו
Psa 96:12 יב  יעלז שדי וכל-אשר-בו    אז ירננו כל-עצי-יער
Psa 96:13 יג  לפני יהוה כי בא--    כי בא לשפט הארץ ישפט-תבל בצדק    ועמים באמונתו