Allepo, Psalms, Chapter 094

Psa 94:1 א  אל-נקמות יהוה    אל נקמות הופיע
Psa 94:2 ב  הנשא שפט הארץ    השב גמול על-גאים
Psa 94:3 ג  עד-מתי רשעים יהוה    עד-מתי רשעים יעלזו
Psa 94:4 ד  יביעו ידברו עתק    יתאמרו כל-פעלי און
Psa 94:5 ה  עמך יהוה ידכאו    ונחלתך יענו
Psa 94:6 ו  אלמנה וגר יהרגו    ויתומים ירצחו
Psa 94:7 ז  ויאמרו לא יראה-יה    ולא-יבין אלהי יעקב
Psa 94:8 ח  בינו בערים בעם    וכסילים מתי תשכילו
Psa 94:9 ט  הנטע אזן הלא ישמע    אם-יצר עין הלא יביט
Psa 94:10 י  היסר גוים הלא יוכיח    המלמד אדם דעת
Psa 94:11 יא  יהוה--ידע מחשבות אדם    כי-המה הבל
Psa 94:12 יב  אשרי הגבר אשר-תיסרנו יה    ומתורתך תלמדנו
Psa 94:13 יג  להשקיט לו מימי רע--    עד יכרה לרשע שחת
Psa 94:14 יד  כי לא-יטש יהוה עמו    ונחלתו לא יעזב
Psa 94:15 טו  כי-עד-צדק ישוב משפט    ואחריו כל-ישרי-לב
Psa 94:16 טז  מי-יקום לי עם-מרעים    מי-יתיצב לי עם-פעלי און
Psa 94:17 יז  לולי יהוה עזרתה לי--    כמעט שכנה דומה נפשי
Psa 94:18 יח  אם-אמרתי מטה רגלי    חסדך יהוה יסעדני
Psa 94:19 יט  ברב שרעפי בקרבי--    תנחומיך ישעשעו נפשי
Psa 94:20 כ  היחברך כסא הוות    יצר עמל עלי-חק
Psa 94:21 כא  יגודו על-נפש צדיק    ודם נקי ירשיעו
Psa 94:22 כב  ויהי יהוה לי למשגב    ואלהי לצור מחסי
Psa 94:23 כג  וישב עליהם את אונם--    וברעתם יצמיתם יצמיתם    יהוה אלהינו