Psa 91:1 א  ישב בסתר עליון    בצל שדי יתלונן
Psa 91:2 ב  אמר--ליהוה מחסי ומצודתי    אלהי אבטח-בו
Psa 91:3 ג  כי הוא יצילך מפח יקוש    מדבר הוות
Psa 91:4 ד  באברתו יסך לך--ותחת-כנפיו תחסה    צנה וסחרה אמתו
Psa 91:5 ה  לא-תירא מפחד לילה    מחץ יעוף יומם
Psa 91:6 ו  מדבר באפל יהלך    מקטב ישוד צהרים
Psa 91:7 ז  יפל מצדך אלף--ורבבה מימינך    אליך לא יגש
Psa 91:8 ח  רק בעיניך תביט    ושלמת רשעים תראה
Psa 91:9 ט  כי-אתה יהוה מחסי    עליון שמת מעונך
Psa 91:10 י  לא-תאנה אליך רעה    ונגע לא-יקרב באהלך
Psa 91:11 יא  כי מלאכיו יצוה-לך    לשמרך בכל-דרכיך
Psa 91:12 יב  על-כפים ישאונך    פן-תגף באבן רגלך
Psa 91:13 יג  על-שחל ופתן תדרך    תרמס כפיר ותנין
Psa 91:14 יד  כי בי חשק ואפלטהו    אשגבהו כי-ידע שמי
Psa 91:15 טו  יקראני ואענהו--עמו-אנכי בצרה    אחלצהו ואכבדהו
Psa 91:16 טז  ארך ימים אשביעהו    ואראהו בישועתי