Allepo, Psalms, Chapter 090

Psa 90:1 א  תפלה למשה איש-האלהים אדני--מעון אתה היית לנו    בדר ודר
Psa 90:2 ב  בטרם הרים ילדו--    ותחולל ארץ ותבל ומעולם עד-עולם    אתה אל
Psa 90:3 ג  תשב אנוש עד-דכא    ותאמר שובו בני-אדם
Psa 90:4 ד  כי אלף שנים בעיניך--    כיום אתמול כי יעבר ואשמורה    בלילה
Psa 90:5 ה  זרמתם שנה יהיו    בבקר כחציר יחלף
Psa 90:6 ו  בבקר יציץ וחלף    לערב ימולל ויבש
Psa 90:7 ז  כי-כלינו באפך    ובחמתך נבהלנו
Psa 90:8 ח  שת (שתה) עונתינו לנגדך    עלמנו למאור פניך
Psa 90:9 ט  כי כל-ימינו פנו בעברתך    כלינו שנינו כמו-הגה
Psa 90:10 י  ימי-שנותינו בהם שבעים שנה    ואם בגבורת שמונים שנה-- ורהבם    עמל ואון כי-גז חיש    ונעפה
Psa 90:11 יא  מי-יודע עז אפך    וכיראתך עברתך
Psa 90:12 יב  למנות ימינו כן הודע    ונבא לבב חכמה
Psa 90:13 יג  שובה יהוה עד-מתי    והנחם על-עבדיך
Psa 90:14 יד  שבענו בבקר חסדך    ונרננה ונשמחה בכל-ימינו
Psa 90:15 טו  שמחנו כימות עניתנו    שנות ראינו רעה
Psa 90:16 טז  יראה אל-עבדיך פעלך    והדרך על-בניהם
Psa 90:17 יז  ויהי נעם אדני אלהינו--    עלינו ומעשה ידינו כוננה עלינו    ומעשה ידינו כוננהו