Allepo, Psalms, Chapter 086

Psa 86:1 א  תפלה לדוד הטה-יהוה אזנך ענני--    כי-עני ואביון אני
Psa 86:2 ב  שמרה נפשי    כי-חסיד אני הושע עבדך אתה אלהי--    הבוטח אליך
Psa 86:3 ג  חנני אדני    כי אליך אקרא כל-היום
Psa 86:4 ד  שמח נפש עבדך    כי אליך אדני נפשי אשא
Psa 86:5 ה  כי-אתה אדני טוב וסלח    ורב-חסד לכל-קראיך
Psa 86:6 ו  האזינה יהוה תפלתי    והקשיבה בקול תחנונותי
Psa 86:7 ז  ביום צרתי אקראך    כי תענני
Psa 86:8 ח  אין-כמוך באלהים אדני    ואין כמעשיך
Psa 86:9 ט  כל-גוים אשר עשית--יבואו וישתחוו לפניך אדני    ויכבדו לשמך
Psa 86:10 י  כי-גדול אתה ועשה נפלאות    אתה אלהים לבדך
Psa 86:11 יא  הורני יהוה דרכך--    אהלך באמתך יחד לבבי    ליראה שמך
Psa 86:12 יב  אודך אדני אלהי--בכל-לבבי    ואכבדה שמך לעולם
Psa 86:13 יג  כי-חסדך גדול עלי    והצלת נפשי משאול תחתיה
Psa 86:14 יד  אלהים זדים קמו-עלי    ועדת עריצים בקשו נפשי ולא שמוך    לנגדם
Psa 86:15 טו  ואתה אדני אל-רחום וחנון    ארך אפים ורב-חסד ואמת
Psa 86:16 טז  פנה אלי וחנני    תנה-עזך לעבדך והושיעה לבן-אמתך
Psa 86:17 יז  עשה-עמי אות    לטובה ויראו שנאי ויבשו--    כי-אתה יהוה עזרתני ונחמתני