Psa 84:1 א  למנצח על-הגתית לבני-קרח מזמור
Psa 84:2 ב  מה-ידידות משכנותיך--    יהוה צבאות
Psa 84:3 ג  נכספה וגם-כלתה נפשי--    לחצרות יהוה לבי ובשרי--    ירננו אל אל-חי
Psa 84:4 ד  גם-צפור מצאה בית ודרור קן לה--    אשר-שתה אפרחיה את-מזבחותיך יהוה צבאות--    מלכי ואלהי
Psa 84:5 ה  אשרי יושבי ביתך--    עוד יהללוך סלה
Psa 84:6 ו  אשרי אדם עוז-לו בך    מסלות בלבבם
Psa 84:7 ז  עברי בעמק הבכא--    מעין ישיתוהו גם-ברכות    יעטה מורה
Psa 84:8 ח  ילכו מחיל אל-חיל    יראה אל-אלהים בציון
Psa 84:9 ט  יהוה אלהים צבאות    שמעה תפלתי האזינה אלהי יעקב    סלה
Psa 84:10 י  מגננו ראה אלהים    והבט פני משיחך
Psa 84:11 יא  כי טוב-יום בחצריך    מאלף בחרתי--הסתופף בבית אלהי    מדור באהלי-רשע
Psa 84:12 יב  כי שמש ומגן--    יהוה אלהים חן וכבוד    יתן יהוה לא ימנע-טוב    להלכים בתמים [ (Psalms 84:13) יג  יהוה צבאות--    אשרי אדם בטח בך ]