Psa 80:1 א  למנצח אל-ששנים    עדות לאסף מזמור
Psa 80:2 ב  רעה ישראל האזינה--    נהג כצאן יוסף ישב הכרובים    הופיעה
Psa 80:3 ג  לפני אפרים ובנימן ומנשה--    עוררה את-גבורתך ולכה לישעתה    לנו
Psa 80:4 ד  אלהים השיבנו    והאר פניך ונושעה
Psa 80:5 ה  יהוה אלהים צבאות--    עד-מתי עשנת בתפלת עמך
Psa 80:6 ו  האכלתם לחם דמעה    ותשקמו בדמעות שליש
Psa 80:7 ז  תשימנו מדון לשכנינו    ואיבינו ילעגו-למו
Psa 80:8 ח  אלהים צבאות השיבנו    והאר פניך ונושעה
Psa 80:9 ט  גפן ממצרים תסיע    תגרש גוים ותטעה
Psa 80:10 י  פנית לפניה    ותשרש שרשיה ותמלא-ארץ
Psa 80:11 יא  כסו הרים צלה    וענפיה ארזי-אל
Psa 80:12 יב  תשלח קצירה עד-ים    ואל-נהר יונקותיה
Psa 80:13 יג  למה פרצת גדריה    וארוה כל-עברי דרך
Psa 80:14 יד  יכרסמנה חזיר מיער    וזיז שדי ירענה
Psa 80:15 טו  אלהים צבאות    שוב-נא הבט משמים וראה    ופקד גפן זאת
Psa 80:16 טז  וכנה אשר-נטעה ימינך    ועל-בן אמצתה לך
Psa 80:17 יז  שרפה באש כסוחה    מגערת פניך יאבדו
Psa 80:18 יח  תהי-ידך על-איש ימינך    על-בן-אדם אמצת לך
Psa 80:19 יט  ולא-נסוג ממך    תחינו ובשמך נקרא [ (Psalms 80:20) כ  יהוה אלהים צבאות השיבנו    האר פניך ונושעה ]