Allepo, Psalms, Chapter 079

Psa 79:1 א  מזמור לאסף אלהים באו גוים בנחלתך--    טמאו את היכל קדשך שמו את-ירושלם    לעיים
Psa 79:2 ב  נתנו את-נבלת עבדיך--    מאכל לעוף השמים בשר חסידיך    לחיתו-ארץ
Psa 79:3 ג  שפכו דמם כמים--סביבות ירושלם    ואין קובר
Psa 79:4 ד  היינו חרפה לשכנינו    לעג וקלס לסביבותינו
Psa 79:5 ה  עד-מה יהוה תאנף לנצח    תבער כמו-אש קנאתך
Psa 79:6 ו  שפך חמתך--    אל הגוים אשר לא-ידעוך ועל ממלכות--    אשר בשמך לא קראו
Psa 79:7 ז  כי אכל את-יעקב    ואת-נוהו השמו
Psa 79:8 ח  אל-תזכר-לנו    עונת ראשנים מהר יקדמונו רחמיך--    כי דלונו מאד
Psa 79:9 ט  עזרנו אלהי ישענו--    על-דבר כבוד-שמך והצילנו וכפר על-חטאתינו    למען שמך
Psa 79:10 י  למה יאמרו הגוים--    איה אלהיהם יודע בגיים (בגוים) לעינינו    נקמת דם-עבדיך השפוך
Psa 79:11 יא  תבוא לפניך אנקת אסיר    כגדל זרועך--הותר בני תמותה
Psa 79:12 יב  והשב לשכנינו שבעתים    אל-חיקם חרפתם אשר חרפוך    אדני
Psa 79:13 יג  ואנחנו עמך וצאן מרעיתך--    נודה לך לעולם לדר ודר--    נספר תהלתך