Allepo, Psalms, Chapter 077

Psa 77:1 א  למנצח על-ידיתון (ידותון) לאסף מזמור
Psa 77:2 ב  קולי אל-אלהים ואצעקה    קולי אל-אלהים והאזין אלי
Psa 77:3 ג  ביום צרתי    אדני דרשתי ידי לילה נגרה--ולא תפוג    מאנה הנחם נפשי
Psa 77:4 ד  אזכרה אלהים ואהמיה    אשיחה ותתעטף רוחי סלה
Psa 77:5 ה  אחזת שמרות עיני    נפעמתי ולא אדבר
Psa 77:6 ו  חשבתי ימים מקדם--    שנות עולמים
Psa 77:7 ז  אזכרה נגינתי בלילה    עם-לבבי אשיחה ויחפש רוחי
Psa 77:8 ח  הלעולמים יזנח אדני    ולא-יסיף לרצות עוד
Psa 77:9 ט  האפס לנצח חסדו    גמר אמר לדר ודר
Psa 77:10 י  השכח חנות אל    אם-קפץ באף רחמיו סלה
Psa 77:11 יא  ואמר חלותי היא--    שנות ימין עליון
Psa 77:12 יב  אזכיר (אזכור) מעללי-יה    כי-אזכרה מקדם פלאך
Psa 77:13 יג  והגיתי בכל-פעלך    ובעלילותיך אשיחה
Psa 77:14 יד  אלהים בקדש דרכך    מי-אל גדול כאלהים
Psa 77:15 טו  אתה האל עשה פלא    הודעת בעמים עזך
Psa 77:16 טז  גאלת בזרוע עמך    בני-יעקב ויוסף סלה
Psa 77:17 יז  ראוך מים אלהים--ראוך מים יחילו    אף ירגזו תהמות
Psa 77:18 יח  זרמו מים עבות--קול נתנו שחקים    אף-חצציך יתהלכו
Psa 77:19 יט  קול רעמך בגלגל--האירו ברקים תבל    רגזה ותרעש הארץ
Psa 77:20 כ  בים דרכך--ושביליך (ושבילך) במים רבים    ועקבותיך לא נדעו [ (Psalms 77:21) כא  נחית כצאן עמך--    ביד-משה ואהרן ]