Psa 74:1 א  משכיל לאסף למה אלהים זנחת לנצח    יעשן אפך בצאן מרעיתך
Psa 74:2 ב  זכר עדתך קנית קדם--    גאלת שבט נחלתך הר-ציון    זה שכנת בו
Psa 74:3 ג  הרימה פעמיך למשאות נצח    כל-הרע אויב בקדש
Psa 74:4 ד  שאגו צרריך בקרב מועדך    שמו אותתם אתות
Psa 74:5 ה  יודע כמביא למעלה    בסבך-עץ קרדמות
Psa 74:6 ו  ועת (ועתה) פתוחיה יחד--    בכשיל וכילפות יהלמון
Psa 74:7 ז  שלחו באש מקדשך    לארץ חללו משכן-שמך
Psa 74:8 ח  אמרו בלבם נינם יחד    שרפו כל-מועדי-אל בארץ
Psa 74:9 ט  אותתינו לא ראינו    אין-עוד נביא ולא-אתנו ידע עד-מה
Psa 74:10 י  עד-מתי אלהים יחרף צר    ינאץ אויב שמך לנצח
Psa 74:11 יא  למה תשיב ידך וימינך    מקרב חוקך (חיקך) כלה
Psa 74:12 יב  ואלהים מלכי מקדם    פעל ישועות בקרב הארץ
Psa 74:13 יג  אתה פוררת בעזך ים    שברת ראשי תנינים על-המים
Psa 74:14 יד  אתה רצצת ראשי לויתן    תתננו מאכל לעם לציים
Psa 74:15 טו  אתה בקעת מעין ונחל    אתה הובשת נהרות איתן
Psa 74:16 טז  לך יום אף-לך לילה    אתה הכינות מאור ושמש
Psa 74:17 יז  אתה הצבת כל-גבולות ארץ    קיץ וחרף אתה יצרתם
Psa 74:18 יח  זכר-זאת--אויב חרף יהוה    ועם נבל נאצו שמך
Psa 74:19 יט  אל-תתן לחית נפש תורך    חית ענייך אל-תשכח לנצח
Psa 74:20 כ  הבט לברית    כי מלאו מחשכי-ארץ נאות חמס
Psa 74:21 כא  אל-ישב דך נכלם    עני ואביון יהללו שמך
Psa 74:22 כב  קומה אלהים ריבה ריבך    זכר חרפתך מני-נבל כל-היום
Psa 74:23 כג  אל-תשכח קול צרריך    שאון קמיך עלה תמיד