Psa 71:1 א  בך-יהוה חסיתי    אל-אבושה לעולם
Psa 71:2 ב  בצדקתך תצילני ותפלטני    הטה-אלי אזנך והושיעני
Psa 71:3 ג  היה לי לצור מעון לבוא--    תמיד צוית להושיעני כי-סלעי ומצודתי    אתה
Psa 71:4 ד  אלהי--פלטני מיד רשע    מכף מעול וחומץ
Psa 71:5 ה  כי-אתה תקותי    אדני יהוה מבטחי מנעורי
Psa 71:6 ו  עליך נסמכתי מבטן--ממעי אמי אתה גוזי    בך תהלתי תמיד
Psa 71:7 ז  כמופת הייתי לרבים    ואתה מחסי-עז
Psa 71:8 ח  ימלא פי תהלתך    כל-היום תפארתך
Psa 71:9 ט  אל-תשליכני לעת זקנה    ככלות כחי אל-תעזבני
Psa 71:10 י  כי-אמרו אויבי לי    ושמרי נפשי נועצו יחדו
Psa 71:11 יא  לאמר אלהים עזבו    רדפו ותפשוהו כי-אין מציל
Psa 71:12 יב  אלהים אל-תרחק ממני    אלהי לעזרתי חישה (חושה)
Psa 71:13 יג  יבשו יכלו שטני נפשי    יעטו חרפה וכלמה--מבקשי רעתי
Psa 71:14 יד  ואני תמיד איחל    והוספתי על-כל-תהלתך
Psa 71:15 טו  פי יספר צדקתך--כל-היום תשועתך    כי לא ידעתי ספרות
Psa 71:16 טז  אבוא--בגברות אדני יהוה    אזכיר צדקתך לבדך
Psa 71:17 יז  אלהים למדתני מנעורי    ועד-הנה אגיד נפלאותיך
Psa 71:18 יח  וגם עד-זקנה ושיבה--    אלהים אל-תעזבני עד-אגיד זרועך לדור    לכל-יבוא גבורתך
Psa 71:19 יט  וצדקתך אלהים    עד-מרום אשר-עשית גדלות    אלהים מי כמוך
Psa 71:20 כ  אשר הראיתנו (הראיתני) צרות רבות--    ורעות תשוב תחינו (תחיני)    ומתהמות הארץ תשוב תעלני
Psa 71:21 כא  תרב גדלתי    ותסב תנחמני
Psa 71:22 כב  גם-אני אודך בכלי-נבל--    אמתך אלהי אזמרה לך בכנור--    קדוש ישראל
Psa 71:23 כג  תרננה שפתי כי אזמרה-לך    ונפשי אשר פדית
Psa 71:24 כד  גם-לשוני--    כל-היום תהגה צדקתך כי-בשו כי-חפרו    מבקשי רעתי