Psa 68:1 א  למנצח לדוד מזמור שיר
Psa 68:2 ב  יקום אלהים יפוצו אויביו    וינוסו משנאיו מפניו
Psa 68:3 ג  כהנדף עשן    תנדף כהמס דונג מפני-אש--    יאבדו רשעים מפני אלהים
Psa 68:4 ד  וצדיקים--ישמחו יעלצו לפני אלהים    וישישו בשמחה
Psa 68:5 ה  שירו לאלהים--    זמרו שמו סלו לרכב בערבות--ביה שמו    ועלזו לפניו
Psa 68:6 ו  אבי יתומים ודין אלמנות--    אלהים במעון קדשו
Psa 68:7 ז  אלהים מושיב יחידים ביתה--    מוציא אסירים בכושרות אך סוררים    שכנו צחיחה
Psa 68:8 ח  אלהים--בצאתך לפני עמך    בצעדך בישימון סלה
Psa 68:9 ט  ארץ רעשה אף-שמים נטפו--    מפני אלהים זה סיני--    מפני אלהים אלהי ישראל
Psa 68:10 י  גשם נדבות תניף אלהים    נחלתך ונלאה אתה כוננתה
Psa 68:11 יא  חיתך ישבו-בה    תכין בטובתך לעני אלהים
Psa 68:12 יב  אדני יתן-אמר    המבשרות צבא רב
Psa 68:13 יג  מלכי צבאות ידדון ידדון    ונות-בית תחלק שלל
Psa 68:14 יד  אם-תשכבון    בין שפתים כנפי יונה נחפה בכסף    ואברותיה בירקרק חרוץ
Psa 68:15 טו  בפרש שדי מלכים בה--    תשלג בצלמון
Psa 68:16 טז  הר-אלהים הר-בשן    הר גבננים הר-בשן
Psa 68:17 יז  למה תרצדון--    הרים גבננים ההר--חמד אלהים לשבתו    אף-יהוה ישכן לנצח
Psa 68:18 יח  רכב אלהים רבתים אלפי שנאן    אדני בם סיני בקדש
Psa 68:19 יט  עלית למרום שבית שבי--    לקחת מתנות באדם ואף סוררים    לשכן יה אלהים
Psa 68:20 כ  ברוך אדני יום יום    יעמס-לנו--האל ישועתנו סלה
Psa 68:21 כא  האל לנו אל למושעות    וליהוה אדני--למות תצאות
Psa 68:22 כב  אך-אלהים--ימחץ ראש איביו    קדקד שער--מתהלך באשמיו
Psa 68:23 כג  אמר אדני מבשן אשיב    אשיב ממצלות ים
Psa 68:24 כד  למען תמחץ רגלך--בדם    לשון כלביך--מאיבים מנהו
Psa 68:25 כה  ראו הליכותיך אלהים    הליכות אלי מלכי בקדש
Psa 68:26 כו  קדמו שרים אחר נגנים    בתוך עלמות תופפות
Psa 68:27 כז  במקהלות ברכו אלהים    אדני ממקור ישראל
Psa 68:28 כח  שם בנימן צעיר רדם--שרי יהודה רגמתם    שרי זבלון שרי נפתלי
Psa 68:29 כט  צוה אלהיך עזך    עוזה אלהים--זו פעלת לנו
Psa 68:30 ל  מהיכלך על-ירושלם--    לך יובילו מלכים שי
Psa 68:31 לא  גער חית קנה עדת אבירים בעגלי עמים--    מתרפס ברצי-כסף בזר עמים    קרבות יחפצו
Psa 68:32 לב  יאתיו חשמנים מני מצרים    כוש תריץ ידיו לאלהים
Psa 68:33 לג  ממלכות הארץ שירו לאלהים    זמרו אדני סלה
Psa 68:34 לד  לרכב בשמי שמי-קדם--    הן יתן בקולו קול עז
Psa 68:35 לה  תנו עז לאלהים    על-ישראל גאותו ועזו בשחקים [ (Psalms 68:36) לו  נורא אלהים    ממקדשיך אל ישראל--    הוא נתן עז ותעצמות לעם ברוך אלהים ]