Allepo, Psalms, Chapter 066

Psa 66:1 א  למנצח שיר מזמור    הריעו לאלהים כל-הארץ
Psa 66:2 ב  זמרו כבוד-שמו    שימו כבוד תהלתו
Psa 66:3 ג  אמרו לאלהים מה-נורא מעשיך    ברב עזך יכחשו לך איביך
Psa 66:4 ד  כל-הארץ ישתחוו לך--ויזמרו-לך    יזמרו שמך סלה
Psa 66:5 ה  לכו וראו מפעלות אלהים    נורא עלילה על-בני אדם
Psa 66:6 ו  הפך ים ליבשה--בנהר יעברו ברגל    שם נשמחה-בו
Psa 66:7 ז  משל בגבורתו עולם--    עיניו בגוים תצפינה הסוררים    אל-ירימו (ירומו) למו סלה
Psa 66:8 ח  ברכו עמים אלהינו    והשמיעו קול תהלתו
Psa 66:9 ט  השם נפשנו בחיים    ולא-נתן למוט רגלנו
Psa 66:10 י  כי-בחנתנו אלהים    צרפתנו כצרף-כסף
Psa 66:11 יא  הבאתנו במצודה    שמת מועקה במתנינו
Psa 66:12 יב  הרכבת אנוש לראשנו    באנו-באש ובמים ותוציאנו לרויה
Psa 66:13 יג  אבוא ביתך בעולות    אשלם לך נדרי
Psa 66:14 יד  אשר-פצו שפתי    ודבר-פי בצר-לי
Psa 66:15 טו  עלות מיחים אעלה-לך    עם-קטרת אילים אעשה בקר עם-עתודים    סלה
Psa 66:16 טז  לכו-שמעו ואספרה כל-יראי אלהים    אשר עשה לנפשי
Psa 66:17 יז  אליו פי-קראתי    ורומם תחת לשוני
Psa 66:18 יח  און אם-ראיתי בלבי--    לא ישמע אדני
Psa 66:19 יט  אכן שמע אלהים    הקשיב בקול תפלתי
Psa 66:20 כ  ברוך אלהים--    אשר לא-הסיר תפלתי וחסדו מאתי