Psa 65:1 א  למנצח מזמור לדוד שיר
Psa 65:2 ב  לך דמיה תהלה אלהים בציון    ולך ישלם-נדר
Psa 65:3 ג  שמע תפלה--    עדיך כל-בשר יבאו
Psa 65:4 ד  דברי עונת גברו מני    פשעינו אתה תכפרם
Psa 65:5 ה  אשרי תבחר ותקרב--    ישכן חצריך נשבעה בטוב ביתך    קדש היכלך
Psa 65:6 ו  נוראות בצדק תעננו--    אלהי ישענו מבטח כל-קצוי-ארץ    וים רחקים
Psa 65:7 ז  מכין הרים בכחו    נאזר בגבורה
Psa 65:8 ח  משביח שאון ימים--שאון גליהם    והמון לאמים
Psa 65:9 ט  וייראו ישבי קצות--מאותתיך    מוצאי בקר וערב תרנין
Psa 65:10 י  פקדת הארץ ותשקקה רבת תעשרנה--    פלג אלהים מלא מים תכין דגנם    כי-כן תכינה
Psa 65:11 יא  תלמיה רוה נחת גדודה    ברביבים תמגגנה צמחה תברך
Psa 65:12 יב  עטרת שנת טובתך    ומעגליך ירעפון דשן
Psa 65:13 יג  ירעפו נאות מדבר    וגיל גבעות תחגרנה [ (Psalms 65:14) יד  לבשו כרים הצאן--    ועמקים יעטפו-בר יתרועעו    אף-ישירו ]