Psa 63:1 א  מזמור לדוד    בהיותו במדבר יהודה
Psa 63:2 ב  אלהים אלי אתה--    אשחרך צמאה לך נפשי--    כמה לך בשרי בארץ-ציה ועיף    בלי-מים
Psa 63:3 ג  כן בקדש חזיתך--    לראות עזך וכבודך
Psa 63:4 ד  כי-טוב חסדך מחיים    שפתי ישבחונך
Psa 63:5 ה  כן אברכך בחיי    בשמך אשא כפי
Psa 63:6 ו  כמו חלב ודשן תשבע נפשי    ושפתי רננות יהלל-פי
Psa 63:7 ז  אם-זכרתיך על-יצועי--    באשמרות אהגה-בך
Psa 63:8 ח  כי-היית עזרתה לי    ובצל כנפיך ארנן
Psa 63:9 ט  דבקה נפשי אחריך    בי תמכה ימינך
Psa 63:10 י  והמה--לשואה יבקשו נפשי    יבאו בתחתיות הארץ
Psa 63:11 יא  יגירהו על-ידי-חרב    מנת שעלים יהיו [ (Psalms 63:12) יב  והמלך    ישמח באלהים יתהלל כל-הנשבע בו    כי יסכר פי דוברי-שקר ]