Allepo, Psalms, Chapter 062

Psa 62:1 א  למנצח על-ידותון--    מזמור לדוד
Psa 62:2 ב  אך אל-אלהים דומיה נפשי    ממנו ישועתי
Psa 62:3 ג  אך-הוא צורי וישועתי    משגבי לא-אמוט רבה
Psa 62:4 ד  עד-אנה תהותתו על-איש--    תרצחו כלכם כקיר נטוי    גדר הדחויה
Psa 62:5 ה  אך משאתו יעצו להדיח--    ירצו כזב בפיו יברכו    ובקרבם יקללו-סלה
Psa 62:6 ו  אך לאלהים דומי נפשי    כי-ממנו תקותי
Psa 62:7 ז  אך-הוא צורי וישועתי    משגבי לא אמוט
Psa 62:8 ח  על-אלהים ישעי וכבודי    צור-עזי מחסי באלהים
Psa 62:9 ט  בטחו בו בכל-עת עם--    שפכו-לפניו לבבכם אלהים מחסה-לנו    סלה
Psa 62:10 י  אך הבל בני-אדם--    כזב בני-איש במאזנים לעלות    המה מהבל יחד
Psa 62:11 יא  אל-תבטחו בעשק    ובגזל אל-תהבלו חיל כי-ינוב--    אל-תשיתו לב
Psa 62:12 יב  אחת דבר אלהים--שתים-זו שמעתי    כי עז לאלהים [ (Psalms 62:13) יג  ולך-אדני חסד    כי-אתה תשלם לאיש כמעשהו ]