Psa 57:1 א  למנצח אל-תשחת לדוד מכתם--    בברחו מפני-שאול במערה
Psa 57:2 ב  חנני אלהים חנני--    כי בך חסיה נפשי ובצל-כנפיך אחסה--    עד יעבר הוות
Psa 57:3 ג  אקרא לאלהים עליון    לאל גמר עלי
Psa 57:4 ד  ישלח משמים ויושיעני--    חרף שאפי סלה ישלח אלהים    חסדו ואמתו
Psa 57:5 ה  נפשי בתוך לבאם--    אשכבה להטים בני-אדם--שניהם חנית וחצים    ולשונם חרב חדה
Psa 57:6 ו  רומה על-השמים אלהים    על כל-הארץ כבודך
Psa 57:7 ז  רשת הכינו לפעמי--    כפף נפשי כרו לפני שיחה    נפלו בתוכה סלה
Psa 57:8 ח  נכון לבי אלהים נכון לבי    אשירה ואזמרה
Psa 57:9 ט  עורה כבודי--עורה הנבל וכנור    אעירה שחר
Psa 57:10 י  אודך בעמים אדני    אזמרך בלאמים
Psa 57:11 יא  כי-גדל עד-שמים חסדך    ועד-שחקים אמתך [ (Psalms 57:12) יב  רומה על-שמים אלהים    על כל-הארץ כבודך ]