Psa 55:1 א  למנצח בנגינת משכיל לדוד
Psa 55:2 ב  האזינה אלהים תפלתי    ואל-תתעלם מתחנתי
Psa 55:3 ג  הקשיבה לי וענני    אריד בשיחי ואהימה
Psa 55:4 ד  מקול אויב--מפני עקת רשע    כי-ימיטו עלי און ובאף ישטמוני
Psa 55:5 ה  לבי יחיל בקרבי    ואימות מות נפלו עלי
Psa 55:6 ו  יראה ורעד יבא בי    ותכסני פלצות
Psa 55:7 ז  ואמר--מי-יתן-לי אבר כיונה    אעופה ואשכנה
Psa 55:8 ח  הנה ארחיק נדד    אלין במדבר סלה
Psa 55:9 ט  אחישה מפלט לי--    מרוח סעה מסער
Psa 55:10 י  בלע אדני פלג לשונם    כי-ראיתי חמס וריב בעיר
Psa 55:11 יא  יומם ולילה--יסובבה על-חומתיה    ואון ועמל בקרבה
Psa 55:12 יב  הוות בקרבה    ולא-ימיש מרחבה תך ומרמה
Psa 55:13 יג  כי לא-אויב יחרפני    ואשא לא-משנאי עלי הגדיל    ואסתר ממנו
Psa 55:14 יד  ואתה אנוש כערכי    אלופי ומידעי
Psa 55:15 טו  אשר יחדו נמתיק סוד    בבית אלהים נהלך ברגש
Psa 55:16 טז  ישימות (ישי מות) עלימו--ירדו שאול חיים    כי-רעות במגורם בקרבם
Psa 55:17 יז  אני אל-אלהים אקרא    ויהוה יושיעני
Psa 55:18 יח  ערב ובקר וצהרים אשיחה ואהמה    וישמע קולי
Psa 55:19 יט  פדה בשלום נפשי מקרב-לי    כי-ברבים היו עמדי
Psa 55:20 כ  ישמע אל ויענם--    וישב קדם סלה אשר אין חליפות למו    ולא יראו אלהים
Psa 55:21 כא  שלח ידיו בשלמיו    חלל בריתו
Psa 55:22 כב  חלקו מחמאת פיו--    וקרב-לבו רכו דבריו משמן    והמה פתחות
Psa 55:23 כג  השלך על-יהוה יהבך--    והוא יכלכלך לא-יתן לעולם מוט--    לצדיק [ (Psalms 55:24) כד  ואתה אלהים    תורדם לבאר שחת-- אנשי דמים ומרמה    לא-יחצו ימיהם ואני    אבטח-בך ]