Psa 51:1 א  למנצח מזמור לדוד
Psa 51:2 ב  בבוא-אליו נתן הנביא--    כאשר-בא אל-בת-שבע
Psa 51:3 ג  חנני אלהים כחסדך    כרב רחמיך מחה פשעי
Psa 51:4 ד  הרבה (הרב) כבסני מעוני    ומחטאתי טהרני
Psa 51:5 ה  כי-פשעי אני אדע    וחטאתי נגדי תמיד
Psa 51:6 ו  לך לבדך חטאתי    והרע בעיניך עשיתי למען תצדק בדברך--    תזכה בשפטך
Psa 51:7 ז  הן-בעוון חוללתי    ובחטא יחמתני אמי
Psa 51:8 ח  הן-אמת חפצת בטחות    ובסתם חכמה תודיעני
Psa 51:9 ט  תחטאני באזוב ואטהר    תכבסני ומשלג אלבין
Psa 51:10 י  תשמיעני ששון ושמחה    תגלנה עצמות דכית
Psa 51:11 יא  הסתר פניך מחטאי    וכל-עונתי מחה
Psa 51:12 יב  לב טהור ברא-לי אלהים    ורוח נכון חדש בקרבי
Psa 51:13 יג  אל-תשליכני מלפניך    ורוח קדשך אל-תקח ממני
Psa 51:14 יד  השיבה לי ששון ישעך    ורוח נדיבה תסמכני
Psa 51:15 טו  אלמדה פשעים דרכיך    וחטאים אליך ישובו
Psa 51:16 טז  הצילני מדמים אלהים--    אלהי תשועתי תרנן לשוני    צדקתך
Psa 51:17 יז  אדני שפתי תפתח    ופי יגיד תהלתך
Psa 51:18 יח  כי לא-תחפץ זבח ואתנה    עולה לא תרצה
Psa 51:19 יט  זבחי אלהים    רוח נשברה לב-נשבר ונדכה--    אלהים לא תבזה [ (Psalms 51:20) כ  היטיבה ברצונך את-ציון    תבנה חומות ירושלם ] [ (Psalms 51:21) כא  אז תחפץ זבחי-צדק    עולה וכליל אז יעלו על-מזבחך    פרים ]