Allepo, Psalms, Chapter 050

Psa 50:1 א  מזמור לאסף אל אלהים יהוה--    דבר ויקרא-ארץ ממזרח-שמש    עד-מבאו
Psa 50:2 ב  מציון מכלל-יפי--    אלהים הופיע
Psa 50:3 ג  יבא אלהינו    ואל-יחרש אש-לפניו תאכל    וסביביו נשערה מאד
Psa 50:4 ד  יקרא אל-השמים מעל    ואל-הארץ לדין עמו
Psa 50:5 ה  אספו-לי חסידי--    כרתי בריתי עלי-זבח
Psa 50:6 ו  ויגידו שמים צדקו    כי-אלהים שפט הוא סלה
Psa 50:7 ז  שמעה עמי ואדברה--    ישראל ואעידה בך אלהים אלהיך    אנכי
Psa 50:8 ח  לא על-זבחיך אוכיחך    ועולתיך לנגדי תמיד
Psa 50:9 ט  לא-אקח מביתך פר    ממכלאתיך עתודים
Psa 50:10 י  כי-לי כל-חיתו-יער    בהמות בהררי-אלף
Psa 50:11 יא  ידעתי כל-עוף הרים    וזיז שדי עמדי
Psa 50:12 יב  אם-ארעב לא-אמר לך    כי-לי תבל ומלאה
Psa 50:13 יג  האוכל בשר אבירים    ודם עתודים אשתה
Psa 50:14 יד  זבח לאלהים תודה    ושלם לעליון נדריך
Psa 50:15 טו  וקראני ביום צרה    אחלצך ותכבדני
Psa 50:16 טז  ולרשע אמר אלהים מה-לך לספר חקי    ותשא בריתי עלי-פיך
Psa 50:17 יז  ואתה שנאת מוסר    ותשלך דברי אחריך
Psa 50:18 יח  אם-ראית גנב ותרץ עמו    ועם מנאפים חלקך
Psa 50:19 יט  פיך שלחת ברעה    ולשונך תצמיד מרמה
Psa 50:20 כ  תשב באחיך תדבר    בבן-אמך תתן-דפי
Psa 50:21 כא  אלה עשית והחרשתי--    דמית היות-אהיה כמוך אוכיחך ואערכה    לעיניך
Psa 50:22 כב  בינו-נא זאת שכחי אלוה    פן-אטרף ואין מציל
Psa 50:23 כג  זבח תודה יכבדנני    ושם דרך--אראנו בישע אלהים