Psa 42:1 א  למנצח משכיל לבני-קרח
Psa 42:2 ב  כאיל תערג על-אפיקי-מים--    כן נפשי תערג אליך אלהים
Psa 42:3 ג  צמאה נפשי לאלהים--    לאל חי מתי אבוא    ואראה פני אלהים
Psa 42:4 ד  היתה-לי דמעתי לחם    יומם ולילה באמר אלי כל-היום    איה אלהיך
Psa 42:5 ה  אלה אזכרה    ואשפכה עלי נפשי-- כי אעבר בסך    אדדם עד-בית אלהים בקול-רנה ותודה    המון חוגג
Psa 42:6 ו  מה-תשתוחחי נפשי--    ותהמי עלי הוחלי לאלהים כי-עוד אודנו--    ישועות פניו
Psa 42:7 ז  אלהי--    עלי נפשי תשתוחח על-כן--אזכרך מארץ ירדן    וחרמונים מהר מצער
Psa 42:8 ח  תהום-אל-תהום קורא    לקול צנוריך כל-משבריך וגליך    עלי עברו
Psa 42:9 ט  יומם יצוה יהוה חסדו    ובלילה שירה עמי-- תפלה    לאל חיי
Psa 42:10 י  אומרה לאל סלעי--    למה שכחתני למה-קדר אלך--    בלחץ אויב
Psa 42:11 יא  ברצח בעצמותי--    חרפוני צוררי באמרם אלי כל-היום    איה אלהיך [ (Psalms 42:12) יב  מה-תשתוחחי נפשי--    ומה-תהמי עלי הוחילי לאלהים כי-עוד אודנו--    ישועת פני ואלהי ]