Psa 37:1 א  לדוד  אל-תתחר במרעים    אל-תקנא בעשי עולה
Psa 37:2 ב  כי כחציר מהרה ימלו    וכירק דשא יבולון
Psa 37:3 ג  בטח ביהוה ועשה-טוב    שכן-ארץ ורעה אמונה
Psa 37:4 ד  והתענג על-יהוה    ויתן-לך משאלת לבך
Psa 37:5 ה  גול על-יהוה דרכך    ובטח עליו והוא יעשה
Psa 37:6 ו  והוציא כאור צדקך    ומשפטך כצהרים
Psa 37:7 ז  דום ליהוה--    והתחולל-לו אל-תתחר במצליח דרכו    באיש עשה מזמות
Psa 37:8 ח  הרף מאף ועזב חמה    אל-תתחר אך-להרע
Psa 37:9 ט  כי-מרעים יכרתון    וקוי יהוה המה יירשו-ארץ
Psa 37:10 י  ועוד מעט ואין רשע    והתבוננת על-מקומו ואיננו
Psa 37:11 יא  וענוים יירשו-ארץ    והתענגו על-רב שלום
Psa 37:12 יב  זמם רשע לצדיק    וחרק עליו שניו
Psa 37:13 יג  אדני ישחק-לו    כי-ראה כי-יבא יומו
Psa 37:14 יד  חרב פתחו רשעים--    ודרכו קשתם להפיל עני ואביון    לטבוח ישרי-דרך
Psa 37:15 טו  חרבם תבוא בלבם    וקשתותם תשברנה
Psa 37:16 טז  טוב-מעט לצדיק--    מהמון רשעים רבים
Psa 37:17 יז  כי זרועות רשעים תשברנה    וסומך צדיקים יהוה
Psa 37:18 יח  יודע יהוה ימי תמימם    ונחלתם לעולם תהיה
Psa 37:19 יט  לא-יבשו בעת רעה    ובימי רעבון ישבעו
Psa 37:20 כ  כי רשעים יאבדו ואיבי יהוה כיקר כרים    כלו בעשן כלו
Psa 37:21 כא  לוה רשע ולא ישלם    וצדיק חונן ונותן
Psa 37:22 כב  כי מברכיו יירשו ארץ    ומקלליו יכרתו
Psa 37:23 כג  מיהוה מצעדי-גבר כוננו    ודרכו יחפץ
Psa 37:24 כד  כי-יפל לא-יוטל    כי-יהוה סומך ידו
Psa 37:25 כה  נער הייתי--    גם-זקנתי ולא-ראיתי צדיק נעזב    וזרעו מבקש-לחם
Psa 37:26 כו  כל-היום חונן ומלוה    וזרעו לברכה
Psa 37:27 כז  סור מרע ועשה-טוב    ושכן לעולם
Psa 37:28 כח  כי יהוה אהב משפט    ולא-יעזב את-חסידיו לעולם נשמרו וזרע רשעים    נכרת
Psa 37:29 כט  צדיקים יירשו-ארץ    וישכנו לעד עליה
Psa 37:30 ל  פי-צדיק יהגה חכמה    ולשונו תדבר משפט
Psa 37:31 לא  תורת אלהיו בלבו    לא תמעד אשריו
Psa 37:32 לב  צופה רשע לצדיק    ומבקש להמיתו
Psa 37:33 לג  יהוה לא-יעזבנו בידו    ולא ירשיענו בהשפטו
Psa 37:34 לד  קוה אל-יהוה ושמר דרכו    וירוממך לרשת ארץ בהכרת רשעים    תראה
Psa 37:35 לה  ראיתי רשע עריץ    ומתערה כאזרח רענן
Psa 37:36 לו  ויעבר והנה איננו    ואבקשהו ולא נמצא
Psa 37:37 לז  שמר-תם וראה ישר    כי-אחרית לאיש שלום
Psa 37:38 לח  ופשעים נשמדו יחדו    אחרית רשעים נכרתה
Psa 37:39 לט  ותשועת צדיקים מיהוה    מעוזם בעת צרה
Psa 37:40 מ  ויעזרם יהוה ויפלטם    יפלטם מרשעים ויושיעם--כי-חסו בו