Allepo, Psalms, Chapter 036

Psa 36:1 א  למנצח לעבד-יהוה לדוד
Psa 36:2 ב  נאם-פשע לרשע בקרב לבי    אין-פחד אלהים לנגד עיניו
Psa 36:3 ג  כי-החליק אליו בעיניו    למצא עונו לשנא
Psa 36:4 ד  דברי-פיו און ומרמה    חדל להשכיל להיטיב
Psa 36:5 ה  און יחשב--על-משכבו    יתיצב על-דרך לא-טוב רע לא ימאס
Psa 36:6 ו  יהוה בהשמים חסדך    אמונתך עד-שחקים
Psa 36:7 ז  צדקתך כהררי-אל--משפטיך תהום רבה    אדם ובהמה תושיע יהוה
Psa 36:8 ח  מה-יקר חסדך אלהים    ובני אדם--בצל כנפיך יחסיון
Psa 36:9 ט  ירוין מדשן ביתך    ונחל עדניך תשקם
Psa 36:10 י  כי-עמך מקור חיים    באורך נראה-אור
Psa 36:11 יא  משך חסדך לידעיך    וצדקתך לישרי-לב
Psa 36:12 יב  אל-תבואני רגל גאוה    ויד-רשעים אל-תנדני [ (Psalms 36:13) יג  שם נפלו פעלי און    דחו ולא-יכלו קום ]