Allepo, Psalms, Chapter 035

Psa 35:1 א  לדוד  ריבה יהוה את-יריבי    לחם את-לחמי
Psa 35:2 ב  החזק מגן וצנה    וקומה בעזרתי
Psa 35:3 ג  והרק חנית וסגר לקראת רדפי    אמר לנפשי ישעתך אני
Psa 35:4 ד  יבשו ויכלמו מבקשי נפשי    יסגו אחור ויחפרו--חשבי רעתי
Psa 35:5 ה  יהיו כמץ לפני-רוח    ומלאך יהוה דוחה
Psa 35:6 ו  יהי-דרכם חשך וחלקלקת    ומלאך יהוה רדפם
Psa 35:7 ז  כי-חנם טמנו-לי שחת רשתם    חנם חפרו לנפשי
Psa 35:8 ח  תבואהו שואה    לא-ידע ורשתו אשר-טמן תלכדו    בשואה יפל-בה
Psa 35:9 ט  ונפשי תגיל ביהוה    תשיש בישועתו
Psa 35:10 י  כל עצמותי תאמרנה--    יהוה מי כמוך מציל עני מחזק ממנו    ועני ואביון מגזלו
Psa 35:11 יא  יקומון עדי חמס    אשר לא-ידעתי ישאלוני
Psa 35:12 יב  ישלמוני רעה תחת טובה    שכול לנפשי
Psa 35:13 יג  ואני בחלותם לבושי שק--    עניתי בצום נפשי ותפלתי    על-חיקי תשוב
Psa 35:14 יד  כרע-כאח לי התהלכתי    כאבל-אם קדר שחותי
Psa 35:15 טו  ובצלעי    שמחו ונאספו נאספו עלי נכים    ולא ידעתי קרעו    ולא-דמו
Psa 35:16 טז  בחנפי לעגי מעוג--    חרק עלי שנימו
Psa 35:17 יז  אדני    כמה תראה השיבה נפשי משאיהם    מכפירים יחידתי
Psa 35:18 יח  אודך בקהל רב    בעם עצום אהללך
Psa 35:19 יט  אל-ישמחו-לי איבי שקר    שנאי חנם יקרצו-עין
Psa 35:20 כ  כי לא שלום ידברו    ועל רגעי-ארץ--דברי מרמות יחשבון
Psa 35:21 כא  וירחיבו עלי פיהם    אמרו האח האח ראתה עיננו
Psa 35:22 כב  ראיתה יהוה אל-תחרש    אדני אל-תרחק ממני
Psa 35:23 כג  העירה והקיצה למשפטי    אלהי ואדני לריבי
Psa 35:24 כד  שפטני כצדקך יהוה אלהי    ואל-ישמחו-לי
Psa 35:25 כה  אל-יאמרו בלבם האח נפשנו    אל-יאמרו בלענוהו
Psa 35:26 כו  יבשו ויחפרו יחדו--    שמחי רעתי ילבשו-בשת וכלמה--    המגדילים עלי
Psa 35:27 כז  ירנו וישמחו    חפצי צדקי ויאמרו תמיד יגדל יהוה    החפץ שלום עבדו
Psa 35:28 כח  ולשוני תהגה צדקך    כל-היום תהלתך