Allepo, Psalms, Chapter 033

Psa 33:1 א  רננו צדיקים ביהוה    לישרים נאוה תהלה
Psa 33:2 ב  הודו ליהוה בכנור    בנבל עשור זמרו-לו
Psa 33:3 ג  שירו-לו שיר חדש    היטיבו נגן בתרועה
Psa 33:4 ד  כי-ישר דבר-יהוה    וכל-מעשהו באמונה
Psa 33:5 ה  אהב צדקה ומשפט    חסד יהוה מלאה הארץ
Psa 33:6 ו  בדבר יהוה שמים נעשו    וברוח פיו כל-צבאם
Psa 33:7 ז  כנס כנד מי הים    נתן באוצרות תהומות
Psa 33:8 ח  ייראו מיהוה כל-הארץ    ממנו יגורו כל-ישבי תבל
Psa 33:9 ט  כי הוא אמר ויהי    הוא-צוה ויעמד
Psa 33:10 י  יהוה הפיר עצת-גוים    הניא מחשבות עמים
Psa 33:11 יא  עצת יהוה לעולם תעמד    מחשבות לבו לדר ודר
Psa 33:12 יב  אשרי הגוי אשר-יהוה אלהיו    העם בחר לנחלה לו
Psa 33:13 יג  משמים הביט יהוה    ראה את-כל-בני האדם
Psa 33:14 יד  ממכון-שבתו השגיח--    אל כל-ישבי הארץ
Psa 33:15 טו  היצר יחד לבם    המבין אל-כל-מעשיהם
Psa 33:16 טז  אין-המלך נושע ברב-חיל    גבור לא-ינצל ברב-כח
Psa 33:17 יז  שקר הסוס לתשועה    וברב חילו לא ימלט
Psa 33:18 יח  הנה עין יהוה אל-יראיו    למיחלים לחסדו
Psa 33:19 יט  להציל ממות נפשם    ולחיותם ברעב
Psa 33:20 כ  נפשנו חכתה ליהוה    עזרנו ומגננו הוא
Psa 33:21 כא  כי-בו ישמח לבנו    כי בשם קדשו בטחנו
Psa 33:22 כב  יהי-חסדך יהוה עלינו    כאשר יחלנו לך