Psa 31:1 א  למנצח מזמור לדוד
Psa 31:2 ב  בך-יהוה חסיתי אל-אבושה לעולם    בצדקתך פלטני
Psa 31:3 ג  הטה אלי אזנך--    מהרה הצילני היה לי לצור-מעוז--לבית מצודות    להושיעני
Psa 31:4 ד  כי-סלעי ומצודתי אתה    ולמען שמך תנחני ותנהלני
Psa 31:5 ה  תוציאני--מרשת זו טמנו לי    כי-אתה מעוזי
Psa 31:6 ו  בידך אפקיד רוחי    פדית אותי יהוה--אל אמת
Psa 31:7 ז  שנאתי השמרים הבלי-שוא    ואני אל-יהוה בטחתי
Psa 31:8 ח  אגילה ואשמחה    בחסדך אשר ראית את-עניי    ידעת בצרות נפשי
Psa 31:9 ט  ולא הסגרתני ביד-אויב    העמדת במרחב רגלי
Psa 31:10 י  חנני יהוה    כי צר-לי עששה בכעס עיני    נפשי ובטני
Psa 31:11 יא  כי כלו ביגון חיי--    ושנותי באנחה כשל בעוני כחי    ועצמי עששו
Psa 31:12 יב  מכל-צררי הייתי חרפה ולשכני מאד--    ופחד למידעי ראי בחוץ--    נדדו ממני
Psa 31:13 יג  נשכחתי כמת מלב    הייתי ככלי אבד
Psa 31:14 יד  כי שמעתי דבת רבים--    מגור מסביב בהוסדם יחד עלי    לקחת נפשי זממו
Psa 31:15 טו  ואני עליך בטחתי יהוה    אמרתי אלהי אתה
Psa 31:16 טז  בידך עתתי    הצילני מיד-אויבי ומרדפי
Psa 31:17 יז  האירה פניך על-עבדך    הושיעני בחסדך
Psa 31:18 יח  יהוה--אל-אבושה כי קראתיך    יבשו רשעים ידמו לשאול
Psa 31:19 יט  תאלמנה שפתי-שקר    הדברות על-צדיק עתק--בגאוה ובוז
Psa 31:20 כ  מה רב-טובך    אשר-צפנת ליראיך פעלת לחסים בך    נגד בני אדם
Psa 31:21 כא  תסתירם בסתר פניך--    מרכסי-איש תצפנם בסכה    מריב לשנות
Psa 31:22 כב  ברוך יהוה    כי הפליא חסדו לי בעיר מצור
Psa 31:23 כג  ואני אמרתי בחפזי--    נגרזתי מנגד עיניך אכן--שמעת קול תחנוני    בשועי אליך
Psa 31:24 כד  אהבו את-יהוה    כל-חסידיו אמונים נצר יהוה    ומשלם על-יתר עשה גאוה [ (Psalms 31:25) כה  חזקו ויאמץ לבבכם--    כל-המיחלים ליהוה ]