Psa 29:1 א  מזמור לדוד    הבו ליהוה בני אלים הבו ליהוה כבוד ועז
Psa 29:2 ב  הבו ליהוה כבוד שמו    השתחוו ליהוה בהדרת-קדש
Psa 29:3 ג  קול יהוה    על-המים אל-הכבוד הרעים    יהוה על-מים רבים
Psa 29:4 ד  קול-יהוה בכח    קול יהוה בהדר
Psa 29:5 ה  קול יהוה שבר ארזים    וישבר יהוה את-ארזי הלבנון
Psa 29:6 ו  וירקידם כמו-עגל    לבנון ושרין כמו בן-ראמים
Psa 29:7 ז  קול-יהוה חצב    להבות אש
Psa 29:8 ח  קול יהוה יחיל מדבר    יחיל יהוה מדבר קדש
Psa 29:9 ט  קול יהוה יחולל אילות--    ויחשף יערות ובהיכלו--    כלו אמר כבוד
Psa 29:10 י  יהוה למבול ישב    וישב יהוה מלך לעולם
Psa 29:11 יא  יהוה--עז לעמו יתן    יהוה יברך את-עמו בשלום