Allepo, Psalms, Chapter 027

Psa 27:1 א  לדוד    יהוה אורי וישעי--ממי אירא יהוה מעוז-חיי    ממי אפחד
Psa 27:2 ב  בקרב עלי מרעים--    לאכל את-בשרי צרי ואיבי לי    המה כשלו ונפלו
Psa 27:3 ג  אם-תחנה עלי מחנה--    לא-יירא לבי אם-תקום עלי מלחמה--    בזאת אני בוטח
Psa 27:4 ד  אחת שאלתי מאת-יהוה--    אותה אבקש שבתי בבית-יהוה    כל-ימי חיי לחזות בנעם-יהוה    ולבקר בהיכלו
Psa 27:5 ה  כי יצפנני בסכה--    ביום רעה יסתרני בסתר אהלו    בצור ירוממני
Psa 27:6 ו  ועתה ירום ראשי על איבי סביבותי    ואזבחה באהלו זבחי תרועה אשירה ואזמרה    ליהוה
Psa 27:7 ז  שמע-יהוה קולי אקרא    וחנני וענני
Psa 27:8 ח  לך אמר לבי--בקשו פני    את-פניך יהוה אבקש
Psa 27:9 ט  אל-תסתר פניך ממני--    אל תט-באף עבדך עזרתי היית    אל-תטשני ואל-תעזבני אלהי ישעי
Psa 27:10 י  כי-אבי ואמי עזבוני    ויהוה יאספני
Psa 27:11 יא  הורני יהוה דרכך    ונחני בארח מישור--למען שוררי
Psa 27:12 יב  אל-תתנני בנפש צרי    כי קמו-בי עדי-שקר ויפח חמס
Psa 27:13 יג  לולא--האמנתי לראות בטוב-יהוה    בארץ חיים
Psa 27:14 יד  קוה אל-יהוה    חזק ויאמץ לבך וקוה אל-יהוה