Allepo, Psalms, Chapter 025

Psa 25:1 א  לדוד    אליך יהוה נפשי אשא
Psa 25:2 ב  אלהי--בך בטחתי אל-אבושה    אל-יעלצו אויבי לי
Psa 25:3 ג  גם כל-קויך לא יבשו    יבשו הבוגדים ריקם
Psa 25:4 ד  דרכיך יהוה הודיעני    ארחותיך למדני
Psa 25:5 ה  הדריכני באמתך ולמדני--    כי-אתה אלהי ישעי אותך קויתי    כל-היום
Psa 25:6 ו  זכר-רחמיך יהוה וחסדיך    כי מעולם המה
Psa 25:7 ז  חטאות נעורי ופשעי--    אל-תזכר כחסדך זכר-לי-אתה--    למען טובך יהוה
Psa 25:8 ח  טוב-וישר יהוה    על-כן יורה חטאים בדרך
Psa 25:9 ט  ידרך ענוים במשפט    וילמד ענוים דרכו
Psa 25:10 י  כל-ארחות יהוה חסד ואמת--    לנצרי בריתו ועדתיו
Psa 25:11 יא  למען-שמך יהוה    וסלחת לעוני כי רב-הוא
Psa 25:12 יב  מי-זה האיש ירא יהוה--    יורנו בדרך יבחר
Psa 25:13 יג  נפשו בטוב תלין    וזרעו יירש ארץ
Psa 25:14 יד  סוד יהוה ליראיו    ובריתו להודיעם
Psa 25:15 טו  עיני תמיד אל-יהוה    כי הוא-יוציא מרשת רגלי
Psa 25:16 טז  פנה-אלי וחנני    כי-יחיד ועני אני
Psa 25:17 יז  צרות לבבי הרחיבו    ממצוקותי הוציאני
Psa 25:18 יח  ראה עניי ועמלי    ושא לכל-חטאותי
Psa 25:19 יט  ראה-איבי כי-רבו    ושנאת חמס שנאוני
Psa 25:20 כ  שמרה נפשי והצילני    אל-אבוש כי-חסיתי בך
Psa 25:21 כא  תם-וישר יצרוני    כי קויתיך
Psa 25:22 כב  פדה אלהים את-ישראל--    מכל צרותיו