Allepo, Psalms, Chapter 024

Psa 24:1 א  לדוד מזמור ליהוה הארץ ומלואה    תבל וישבי בה
Psa 24:2 ב  כי-הוא על-ימים יסדה    ועל-נהרות יכוננה
Psa 24:3 ג  מי-יעלה בהר-יהוה    ומי-יקום במקום קדשו
Psa 24:4 ד  נקי כפים    ובר-לבב אשר לא-נשא לשוא נפשי    ולא נשבע למרמה
Psa 24:5 ה  ישא ברכה מאת יהוה    וצדקה מאלהי ישעו
Psa 24:6 ו  זה דור דרשו    מבקשי פניך יעקב סלה
Psa 24:7 ז  שאו שערים ראשיכם    והנשאו פתחי עולם ויבוא    מלך הכבוד
Psa 24:8 ח  מי זה    מלך הכבוד יהוה עזוז וגבור    יהוה גבור מלחמה
Psa 24:9 ט  שאו שערים ראשיכם    ושאו פתחי עולם ויבא    מלך הכבוד
Psa 24:10 י  מי הוא זה    מלך הכבוד יהוה צבאות--    הוא מלך הכבוד סלה