Allepo, Psalms, Chapter 018

Psa 18:1 א  למנצח לעבד יהוה--לדוד אשר דבר ליהוה    את-דברי השירה הזאת-- ביום הציל-יהוה אותו מכף כל-איביו    ומיד שאול
Psa 18:2 ב  ויאמר--    ארחמך יהוה חזקי
Psa 18:3 ג  יהוה סלעי ומצודתי--    ומפלטי אלי צורי אחסה-בו    מגני וקרן-ישעי משגבי
Psa 18:4 ד  מהלל אקרא יהוה    ומן-איבי אושע
Psa 18:5 ה  אפפוני חבלי-מות    ונחלי בליעל יבעתוני
Psa 18:6 ו  חבלי שאול סבבוני    קדמוני מוקשי מות
Psa 18:7 ז  בצר-לי אקרא יהוה--    ואל-אלהי אשוע ישמע מהיכלו קולי    ושועתי לפניו תבוא באזניו
Psa 18:8 ח  ותגעש ותרעש הארץ--    ומוסדי הרים ירגזו ויתגעשו    כי-חרה לו
Psa 18:9 ט  עלה עשן באפו--    ואש-מפיו תאכל גחלים    בערו ממנו
Psa 18:10 י  ויט שמים וירד    וערפל תחת רגליו
Psa 18:11 יא  וירכב על-כרוב ויעף    וידא על-כנפי-רוח
Psa 18:12 יב  ישת חשך סתרו--    סביבותיו סכתו חשכת-מים    עבי שחקים
Psa 18:13 יג  מנגה נגדו    עביו עברו--ברד וגחלי-אש
Psa 18:14 יד  וירעם בשמים יהוה--ועליון יתן קלו    ברד וגחלי-אש
Psa 18:15 טו  וישלח חציו ויפיצם    וברקים רב ויהמם
Psa 18:16 טז  ויראו אפיקי מים    ויגלו מוסדות תבל מגערתך יהוה--    מנשמת רוח אפך
Psa 18:17 יז  ישלח ממרום יקחני    ימשני ממים רבים
Psa 18:18 יח  יצילני מאיבי עז    ומשנאי כי-אמצו ממני
Psa 18:19 יט  יקדמוני ביום-אידי    ויהי-יהוה למשען לי
Psa 18:20 כ  ויוציאני למרחב    יחלצני כי חפץ בי
Psa 18:21 כא  יגמלני יהוה כצדקי    כבר ידי ישיב לי
Psa 18:22 כב  כי-שמרתי דרכי יהוה    ולא-רשעתי מאלהי
Psa 18:23 כג  כי כל-משפטיו לנגדי    וחקתיו לא-אסיר מני
Psa 18:24 כד  ואהי תמים עמו    ואשתמר מעוני
Psa 18:25 כה  וישב-יהוה לי כצדקי    כבר ידי לנגד עיניו
Psa 18:26 כו  עם-חסיד תתחסד    עם-גבר תמים תתמם
Psa 18:27 כז  עם-נבר תתברר    ועם-עקש תתפתל
Psa 18:28 כח  כי-אתה עם-עני תושיע    ועינים רמות תשפיל
Psa 18:29 כט  כי-אתה תאיר נרי    יהוה אלהי יגיה חשכי
Psa 18:30 ל  כי-בך ארץ גדוד    ובאלהי אדלג-שור
Psa 18:31 לא  האל    תמים דרכו אמרת-יהוה צרופה    מגן הוא לכל החסים בו
Psa 18:32 לב  כי מי אלוה מבלעדי יהוה    ומי צור זולתי אלהינו
Psa 18:33 לג  האל המאזרני חיל    ויתן תמים דרכי
Psa 18:34 לד  משוה רגלי כאילות    ועל במתי יעמידני
Psa 18:35 לה  מלמד ידי למלחמה    ונחתה קשת-נחושה זרועתי
Psa 18:36 לו  ותתן-לי מגן ישעך    וימינך תסעדני וענותך תרבני
Psa 18:37 לז  תרחיב צעדי תחתי    ולא מעדו קרסלי
Psa 18:38 לח  ארדוף אויבי ואשיגם    ולא-אשוב עד-כלותם
Psa 18:39 לט  אמחצם ולא-יכלו קום    יפלו תחת רגלי
Psa 18:40 מ  ותאזרני חיל למלחמה    תכריע קמי תחתי
Psa 18:41 מא  ואיבי נתתה לי ערף    ומשנאי אצמיתם
Psa 18:42 מב  ישועו ואין-מושיע    על-יהוה ולא ענם
Psa 18:43 מג  ואשחקם כעפר על-פני-רוח    כטיט חוצות אריקם
Psa 18:44 מד  תפלטני מריבי-עם    תשימני לראש גוים עם לא-ידעתי יעבדוני
Psa 18:45 מה  לשמע אזן ישמעו לי    בני-נכר יכחשו-לי
Psa 18:46 מו  בני-נכר יבלו    ויחרגו ממסגרותיהם
Psa 18:47 מז  חי-יהוה וברוך צורי    וירום אלוהי ישעי
Psa 18:48 מח  האל--הנותן נקמות לי    וידבר עמים תחתי
Psa 18:49 מט  מפלטי מאיבי    אף מן-קמי תרוממני מאיש חמס תצילני
Psa 18:50 נ  על-כן אודך בגוים יהוה    ולשמך אזמרה [ (Psalms 18:51) נא  מגדל    ישועות מלכו ועשה חסד למשיחו--לדוד ולזרעו    עד-עולם ]