Allepo, Psalms, Chapter 017

Psa 17:1 א  תפלה לדוד שמעה יהוה צדק--    הקשיבה רנתי האזינה תפלתי בלא    שפתי מרמה
Psa 17:2 ב  מלפניך משפטי יצא    עיניך תחזינה מישרים
Psa 17:3 ג  בחנת לבי פקדת לילה--    צרפתני בל-תמצא זמתי    בל-יעבר-פי
Psa 17:4 ד  לפעלות אדם בדבר שפתיך--    אני שמרתי ארחות פריץ
Psa 17:5 ה  תמך אשרי במעגלותיך    בל-נמוטו פעמי
Psa 17:6 ו  אני-קראתיך כי-תענני אל    הט-אזנך לי שמע אמרתי
Psa 17:7 ז  הפלה חסדיך מושיע חוסים--    ממתקוממים בימינך
Psa 17:8 ח  שמרני כאישון בת-עין    בצל כנפיך תסתירני
Psa 17:9 ט  מפני רשעים זו שדוני    איבי בנפש יקיפו עלי
Psa 17:10 י  חלבמו סגרו    פימו דברו בגאות
Psa 17:11 יא  אשרינו עתה סבבוני (סבבונו)    עיניהם ישיתו לנטות בארץ
Psa 17:12 יב  דמינו--כאריה יכסוף לטרף    וככפיר ישב במסתרים
Psa 17:13 יג  קומה יהוה--    קדמה פניו הכריעהו פלטה נפשי    מרשע חרבך
Psa 17:14 יד  ממתים ידך יהוה    ממתים מחלד-- חלקם בחיים    וצפינך (וצפונך) תמלא בטנם ישבעו בנים--    והניחו יתרם לעולליהם
Psa 17:15 טו  אני--בצדק אחזה פניך    אשבעה בהקיץ תמונתך