Allepo, Psalms, Chapter 016

Psa 16:1 א  מכתם לדוד    שמרני אל כי-חסיתי בך
Psa 16:2 ב  אמרת ליהוה אדני אתה    טובתי בל-עליך
Psa 16:3 ג  לקדושים אשר-בארץ המה    ואדירי כל-חפצי-בם
Psa 16:4 ד  ירבו עצבותם    אחר מהרו בל-אסיך נסכיהם מדם    ובל-אשא את-שמותם על-שפתי
Psa 16:5 ה  יהוה מנת-חלקי וכוסי--    אתה תומיך גורלי
Psa 16:6 ו  חבלים נפלו-לי בנעמים    אף-נחלת שפרה עלי
Psa 16:7 ז  אברך--את-יהוה אשר יעצני    אף-לילות יסרוני כליותי
Psa 16:8 ח  שויתי יהוה לנגדי תמיד    כי מימיני בל-אמוט
Psa 16:9 ט  לכן שמח לבי--ויגל כבודי    אף-בשרי ישכן לבטח
Psa 16:10 י  כי לא-תעזב נפשי לשאול    לא-תתן חסידך לראות שחת
Psa 16:11 יא  תודיעני    ארח חיים שבע שמחות את-פניך    נעמות בימינך נצח