Allepo, Psalms, Chapter 009

Psa 9:1 א  למנצח על-מות לבן    מזמור לדוד
Psa 9:2 ב  אודה יהוה בכל-לבי    אספרה כל-נפלאותיך
Psa 9:3 ג  אשמחה ואעלצה בך    אזמרה שמך עליון
Psa 9:4 ד  בשוב-אויבי אחור    יכשלו ויאבדו מפניך
Psa 9:5 ה  כי-עשית משפטי ודיני    ישבת לכסא שופט צדק
Psa 9:6 ו  גערת גוים אבדת רשע    שמם מחית לעולם ועד
Psa 9:7 ז  האויב תמו חרבות--לנצח    וערים נתשת--אבד זכרם המה
Psa 9:8 ח  ויהוה לעולם ישב    כונן למשפט כסאו
Psa 9:9 ט  והוא ישפט-תבל בצדק    ידין לאמים במישרים
Psa 9:10 י  ויהי יהוה משגב לדך    משגב לעתות בצרה
Psa 9:11 יא  ויבטחו בך יודעי שמך    כי לא-עזבת דרשיך יהוה
Psa 9:12 יב  זמרו--ליהוה ישב ציון    הגידו בעמים עלילותיו
Psa 9:13 יג  כי-דרש דמים אותם זכר    לא-שכח צעקת עניים (ענוים)
Psa 9:14 יד  חננני יהוה--ראה עניי משנאי    מרוממי משערי מות
Psa 9:15 טו  למען אספרה כל-תהלתיך    בשערי בת-ציון--אגילה בישועתך
Psa 9:16 טז  טבעו גוים בשחת עשו    ברשת-זו טמנו נלכדה רגלם
Psa 9:17 יז  נודע יהוה--משפט עשה    בפעל כפיו נוקש רשע הגיון סלה
Psa 9:18 יח  ישובו רשעים לשאולה    כל-גוים שכחי אלהים
Psa 9:19 יט  כי לא לנצח ישכח אביון    תקות ענוים (עניים) תאבד לעד
Psa 9:20 כ  קומה יהוה אל-יעז אנוש    ישפטו גוים על-פניך [ (Psalms 9:21) כא  שיתה יהוה מורה--להם    ידעו גוים--אנוש המה סלה ]