Job 40:1 א                  ויען יהוה את-איוב ויאמר
Job 40:2 ב  הרב עם-שדי יסור    מוכיח אלוה יעננה
Job 40:3 ג                  ויען איוב את-יהוה ויאמר
Job 40:4 ד  הן קלתי מה אשיבך    ידי שמתי למו-פי
Job 40:5 ה  אחת דברתי ולא אענה    ושתים ולא אוסיף
Job 40:6 ו  ויען-יהוה את-איוב מנסערה (מן סערה)    ויאמר
Job 40:7 ז  אזר-נא כגבר חלציך    אשאלך והודיעני
Job 40:8 ח  האף תפר משפטי    תרשיעני למען תצדק
Job 40:9 ט  ואם-זרוע כאל לך    ובקול כמהו תרעם
Job 40:10 י  עדה נא גאון וגבה    והוד והדר תלבש
Job 40:11 יא  הפץ עברות אפך    וראה כל-גאה והשפילהו
Job 40:12 יב  ראה כל-גאה הכניעהו    והדך רשעים תחתם
Job 40:13 יג  טמנם בעפר יחד    פניהם חבש בטמון
Job 40:14 יד  וגם-אני אודך    כי-תושע לך ימינך
Job 40:15 טו  הנה-נא בהמות אשר-עשיתי עמך    חציר כבקר יאכל
Job 40:16 טז  הנה-נא כחו במתניו    ואונו בשרירי בטנו
Job 40:17 יז  יחפץ זנבו כמו-ארז    גידי פחדו ישרגו
Job 40:18 יח  עצמיו אפיקי נחשה    גרמיו כמטיל ברזל
Job 40:19 יט  הוא ראשית דרכי-אל    העשו יגש חרבו
Job 40:20 כ  כי-בול הרים ישאו-לו    וכל-חית השדה ישחקו-שם
Job 40:21 כא  תחת-צאלים ישכב--    בסתר קנה ובצה
Job 40:22 כב  יסכהו צאלים צללו    יסבוהו ערבי-נחל
Job 40:23 כג  הן יעשק נהר לא יחפוז    יבטח כי-יגיח ירדן אל-פיהו
Job 40:24 כד  בעיניו יקחנו    במוקשים ינקב-אף [ (Job 40:25) כה  תמשך לויתן בחכה    ובחבל תשקיע לשנו ] [ (Job 40:26) כו  התשים אגמן באפו    ובחוח תקב לחיו ] [ (Job 40:27) כז  הירבה אליך תחנונים    אם-ידבר אליך רכות ] [ (Job 40:28) כח  היכרת ברית עמך    תקחנו לעבד עולם ] [ (Job 40:29) כט  התשחק-בו כצפור    ותקשרנו לנערותיך ] [ (Job 40:30) ל  יכרו עליו חברים    יחצוהו בין כנענים ] [ (Job 40:31) לא  התמלא בשכות עורו    ובצלצל דגים ראשו ] [ (Job 40:32) לב  שים-עליו כפך    זכר מלחמה אל-תוסף ]