Job 37:1 א  אף-לזאת יחרד לבי    ויתר ממקומו
Job 37:2 ב  שמעו שמוע ברגז קלו    והגה מפיו יצא
Job 37:3 ג  תחת-כל-השמים ישרהו    ואורו על-כנפות הארץ
Job 37:4 ד  אחריו ישאג-קול--    ירעם בקול גאונו ולא יעקבם    כי-ישמע קולו
Job 37:5 ה  ירעם אל בקולו נפלאות    עשה גדלות ולא נדע
Job 37:6 ו  כי לשלג יאמר--    הוא-ארץ וגשם מטר    וגשם מטרות עזו
Job 37:7 ז  ביד-כל-אדם יחתום--    לדעת כל-אנשי מעשהו
Job 37:8 ח  ותבוא חיה במו-ארב    ובמעונתיה תשכן
Job 37:9 ט  מן-החדר תבוא סופה    וממזרים קרה
Job 37:10 י  מנשמת-אל יתן-קרח    ורחב מים במוצק
Job 37:11 יא  אף-ברי יטריח עב    יפיץ ענן אורו
Job 37:12 יב  והוא מסבות מתהפך בתחבולתו    לפעלם כל אשר יצום    על-פני תבל ארצה
Job 37:13 יג  אם-לשבט אם-לארצו--    אם-לחסד ימצאהו
Job 37:14 יד  האזינה זאת איוב    עמד והתבונן נפלאות אל
Job 37:15 טו  התדע בשום-אלוה עליהם    והפיע אור עננו
Job 37:16 טז  התדע על-מפלשי-עב    מפלאות תמים דעים
Job 37:17 יז  אשר-בגדיך חמים--    בהשקט ארץ מדרום
Job 37:18 יח  תרקיע עמו לשחקים    חזקים כראי מוצק
Job 37:19 יט  הודיענו מה-נאמר לו    לא-נערך מפני-חשך
Job 37:20 כ  היספר-לו כי אדבר    אם-אמר איש כי יבלע
Job 37:21 כא  ועתה לא ראו אור--    בהיר הוא בשחקים ורוח עברה    ותטהרם
Job 37:22 כב  מצפון זהב יאתה    על-אלוה נורא הוד
Job 37:23 כג  שדי לא-מצאנהו שגיא-כח    ומשפט ורב-צדקה לא יענה
Job 37:24 כד  לכן יראוהו אנשים    לא-יראה כל-חכמי-לב