Job 31:1 א  ברית כרתי לעיני    ומה אתבונן על-בתולה
Job 31:2 ב  ומה חלק אלוה ממעל    ונחלת שדי ממרמים
Job 31:3 ג  הלא-איד לעול    ונכר לפעלי און
Job 31:4 ד  הלא-הוא יראה דרכי    וכל-צעדי יספור
Job 31:5 ה  אם-הלכתי עם-שוא    ותחש על-מרמה רגלי
Job 31:6 ו  ישקלני במאזני-צדק    וידע אלוה תמתי
Job 31:7 ז  אם תטה אשרי    מני הדרך ואחר עיני הלך לבי    ובכפי דבק מאום
Job 31:8 ח  אזרעה ואחר יאכל    וצאצאי ישרשו
Job 31:9 ט  אם-נפתה לבי על-אשה    ועל-פתח רעי ארבתי
Job 31:10 י  תטחן לאחר אשתי    ועליה יכרעון אחרין
Job 31:11 יא  כי-הוא (היא) זמה    והיא (והוא) עון פלילים
Job 31:12 יב  כי אש היא עד-אבדון תאכל    ובכל-תבואתי תשרש
Job 31:13 יג  אם-אמאס--משפט עבדי ואמתי    ברבם עמדי
Job 31:14 יד  ומה אעשה כי-יקום אל    וכי-יפקד מה אשיבנו
Job 31:15 טו  הלא-בבטן עשני עשהו    ויכננו ברחם אחד
Job 31:16 טז  אם-אמנע מחפץ דלים    ועיני אלמנה אכלה
Job 31:17 יז  ואכל פתי לבדי    ולא-אכל יתום ממנה
Job 31:18 יח  כי מנעורי גדלני כאב    ומבטן אמי אנחנה
Job 31:19 יט  אם-אראה אובד מבלי לבוש    ואין כסות לאביון
Job 31:20 כ  אם-לא ברכוני חלצו    ומגז כבשי יתחמם
Job 31:21 כא  אם-הניפותי על-יתום ידי    כי-אראה בשער עזרתי
Job 31:22 כב  כתפי משכמה תפול    ואזרעי מקנה תשבר
Job 31:23 כג  כי פחד אלי איד אל    ומשאתו לא אוכל
Job 31:24 כד  אם-שמתי זהב כסלי    ולכתם אמרתי מבטחי
Job 31:25 כה  אם-אשמח כי-רב חילי    וכי-כביר מצאה ידי
Job 31:26 כו  אם-אראה אור כי יהל    וירח יקר הלך
Job 31:27 כז  ויפת בסתר לבי    ותשק ידי לפי
Job 31:28 כח  גם-הוא עון פלילי    כי-כחשתי לאל ממעל
Job 31:29 כט  אם-אשמח בפיד משנאי    והתעררתי כי-מצאו רע
Job 31:30 ל  ולא-נתתי לחטא חכי--    לשאל באלה נפשו
Job 31:31 לא  אם-לא אמרו מתי אהלי    מי-יתן מבשרו לא נשבע
Job 31:32 לב  בחוץ לא-ילין גר    דלתי לארח אפתח
Job 31:33 לג  אם-כסיתי כאדם פשעי--    לטמון בחבי עוני
Job 31:34 לד  כי אערוץ המון רבה--    ובוז-משפחות יחתני ואדם    לא-אצא פתח
Job 31:35 לה  מי יתן-לי שמע לי--    הן-תוי שדי יענני וספר כתב    איש ריבי
Job 31:36 לו  אם-לא על-שכמי אשאנו    אענדנו עטרות לי
Job 31:37 לז  מספר צעדי אגידנו    כמו-נגיד אקרבנו
Job 31:38 לח  אם-עלי אדמתי תזעק    ויחד תלמיה יבכיון
Job 31:39 לט  אם-כחה אכלתי בלי-כסף    ונפש בעליה הפחתי
Job 31:40 מ  תחת חטה יצא חוח--ותחת-שערה באשה    תמו דברי איוב