Allepo, Job, Chapter 30

Job 30:1 א  ועתה שחקו עלי--    צעירים ממני לימים אשר-מאסתי אבותם--    לשית עם-כלבי צאני
Job 30:2 ב  גם-כח ידיהם למה לי    עלימו אבד כלח
Job 30:3 ג  בחסר ובכפן גלמוד    הערקים ציה--אמש שואה ומשאה
Job 30:4 ד  הקטפים מלוח עלי-שיח    ושרש רתמים לחמם
Job 30:5 ה  מן-גו יגרשו    יריעו עלימו כגנב
Job 30:6 ו  בערוץ נחלים לשכן    חרי עפר וכפים
Job 30:7 ז  בין-שיחים ינהקו    תחת חרול יספחו
Job 30:8 ח  בני-נבל גם-בני בלי-שם--    נכאו מן-הארץ
Job 30:9 ט  ועתה נגינתם הייתי    ואהי להם למלה
Job 30:10 י  תעבוני רחקו מני    ומפני לא-חשכו רק
Job 30:11 יא  כי-יתרו (יתרי) פתח ויענני    ורסן מפני שלחו
Job 30:12 יב  על-ימין פרחח יקומו    רגלי שלחו ויסלו עלי ארחות אידם
Job 30:13 יג  נתסו נתיבתי    להותי יעילו לא עזר למו
Job 30:14 יד  כפרץ רחב יאתיו    תחת שאה התגלגלו
Job 30:15 טו  ההפך עלי    בלהות תרדף כרוח נדבתי    וכעב עברה ישעתי
Job 30:16 טז  ועתה--עלי תשתפך נפשי    יאחזוני ימי-עני
Job 30:17 יז  לילה--עצמי נקר מעלי    וערקי לא ישכבון
Job 30:18 יח  ברב-כח יתחפש לבושי    כפי כתנתי יאזרני
Job 30:19 יט  הרני לחמר    ואתמשל כעפר ואפר
Job 30:20 כ  אשוע אליך ולא תענני    עמדתי ותתבנן בי
Job 30:21 כא  תהפך לאכזר לי    בעצם ידך תשטמני
Job 30:22 כב  תשאני אל-רוח תרכיבני    ותמגגני תשוה (תשיה)
Job 30:23 כג  כי-ידעתי מות תשיבני    ובית מועד לכל-חי
Job 30:24 כד  אך לא-בעי ישלח-יד    אם-בפידו להן שוע
Job 30:25 כה  אם-לא בכיתי לקשה-יום    עגמה נפשי לאביון
Job 30:26 כו  כי טוב קויתי ויבא רע    ואיחלה לאור ויבא אפל
Job 30:27 כז  מעי רתחו ולא-דמו    קדמני ימי-עני
Job 30:28 כח  קדר הלכתי בלא חמה    קמתי בקהל אשוע
Job 30:29 כט  אח הייתי לתנים    ורע לבנות יענה
Job 30:30 ל  עורי שחר מעלי    ועצמי-חרה מני-חרב
Job 30:31 לא  ויהי לאבל כנרי    ועגבי לקול בכים