Job 23:1 א                  ויען איוב ויאמר
Job 23:2 ב  גם-היום מרי שחי    ידי כבדה על-אנחתי
Job 23:3 ג  מי-יתן ידעתי ואמצאהו    אבוא עד-תכונתו
Job 23:4 ד  אערכה לפניו משפט    ופי אמלא תוכחות
Job 23:5 ה  אדעה מלים יענני    ואבינה מה-יאמר לי
Job 23:6 ו  הברב-כח יריב עמדי    לא אך-הוא ישם בי
Job 23:7 ז  שם--ישר נוכח עמו    ואפלטה לנצח משפטי
Job 23:8 ח  הן קדם אהלך ואיננו    ואחור ולא-אבין לו
Job 23:9 ט  שמאול בעשתו ולא-אחז    יעטף ימין ולא אראה
Job 23:10 י  כי-ידע דרך עמדי    בחנני כזהב אצא
Job 23:11 יא  באשרו אחזה רגלי    דרכו שמרתי ולא-אט
Job 23:12 יב  מצות שפתיו ולא אמיש    מחקי צפנתי אמרי-פיו
Job 23:13 יג  והוא באחד ומי ישיבנו    ונפשו אותה ויעש
Job 23:14 יד  כי ישלים חקי    וכהנה רבות עמו
Job 23:15 טו  על-כן מפניו אבהל    אתבונן ואפחד ממנו
Job 23:16 טז  ואל הרך לבי    ושדי הבהילני
Job 23:17 יז  כי-לא נצמתי מפני-חשך    ומפני כסה-אפל