Job 21:1 א                  ויען איוב ויאמר
Job 21:2 ב  שמעו שמוע מלתי    ותהי-זאת תנחומתיכם
Job 21:3 ג  שאוני ואנכי אדבר    ואחר דברי תלעיג
Job 21:4 ד  האנכי לאדם שיחי    ואם-מדוע לא-תקצר רוחי
Job 21:5 ה  פנו-אלי והשמו    ושימו יד על-פה
Job 21:6 ו  ואם-זכרתי ונבהלתי    ואחז בשרי פלצות
Job 21:7 ז  מדוע רשעים יחיו    עתקו גם-גברו חיל
Job 21:8 ח  זרעם נכון לפניהם עמם    וצאצאיהם לעיניהם
Job 21:9 ט  בתיהם שלום מפחד    ולא שבט אלוה עליהם
Job 21:10 י  שורו עבר ולא יגעל    תפלט פרתו ולא תשכל
Job 21:11 יא  ישלחו כצאן עויליהם    וילדיהם ירקדון
Job 21:12 יב  ישאו כתף וכנור    וישמחו לקול עוגב
Job 21:13 יג  יבלו (יכלו) בטוב ימיהם    וברגע שאול יחתו
Job 21:14 יד  ויאמרו לאל סור ממנו    ודעת דרכיך לא חפצנו
Job 21:15 טו  מה-שדי כי-נעבדנו    ומה-נועיל כי נפגע-בו
Job 21:16 טז  הן לא בידם טובם    עצת רשעים רחקה מני
Job 21:17 יז  כמה נר-רשעים ידעך--    ויבא עלימו אידם חבלים    יחלק באפו
Job 21:18 יח  יהיו כתבן לפני-רוח    וכמץ גנבתו סופה
Job 21:19 יט  אלוה יצפן-לבניו אונו    ישלם אליו וידע
Job 21:20 כ  יראו עינו כידו    ומחמת שדי ישתה
Job 21:21 כא  כי מה-חפצו בביתו אחריו    ומספר חדשיו חצצו
Job 21:22 כב  הלאל ילמד-דעת    והוא רמים ישפוט
Job 21:23 כג  זה--ימות בעצם תמו    כלו שלאנן ושליו
Job 21:24 כד  עטיניו מלאו חלב    ומח עצמותיו ישקה
Job 21:25 כה  וזה--ימות בנפש מרה    ולא-אכל בטובה
Job 21:26 כו  יחד על-עפר ישכבו    ורמה תכסה עליהם
Job 21:27 כז  הן ידעתי מחשבותיכם    ומזמות עלי תחמסו
Job 21:28 כח  כי תאמרו איה בית-נדיב    ואיה אהל משכנות רשעים
Job 21:29 כט  הלא שאלתם עוברי דרך    ואתתם לא תנכרו
Job 21:30 ל  כי ליום איד יחשך רע    ליום עברות יובלו
Job 21:31 לא  מי-יגיד על-פניו דרכו    והוא-עשה מי ישלם-לו
Job 21:32 לב  והוא לקברות יובל    ועל-גדיש ישקוד
Job 21:33 לג  מתקו-לו רגבי-נחל    ואחריו כל-אדם ימשוך ולפניו אין מספר
Job 21:34 לד  ואיך תנחמוני הבל    ותשובתיכם נשאר-מעל