Allepo, Job, Chapter 20

Job 20:1 א                  ויען צפר הנעמתי ויאמר
Job 20:2 ב  לכן שעפי ישיבוני    ובעבור חושי בי
Job 20:3 ג  מוסר כלמתי אשמע    ורוח מבינתי יענני
Job 20:4 ד  הזאת ידעת מני-עד    מני שים אדם עלי-ארץ
Job 20:5 ה  כי רננת רשעים מקרוב    ושמחת חנף עדי-רגע
Job 20:6 ו  אם-יעלה לשמים שיאו    וראשו לעב יגיע
Job 20:7 ז  כגללו לנצח יאבד    ראיו יאמרו איו
Job 20:8 ח  כחלום יעוף ולא ימצאהו    וידד כחזיון לילה
Job 20:9 ט  עין שזפתו ולא תוסיף    ולא-עוד תשורנו מקומו
Job 20:10 י  בניו ירצו דלים    וידיו תשבנה אונו
Job 20:11 יא  עצמותיו מלאו עלומו    ועמו על-עפר תשכב
Job 20:12 יב  אם-תמתיק בפיו רעה--    יכחידנה תחת לשנו
Job 20:13 יג  יחמל עליה ולא יעזבנה    וימנענה בתוך חכו
Job 20:14 יד  לחמו במעיו נהפך    מרורת פתנים בקרבו
Job 20:15 טו  חיל בלע ויקאנו    מבטנו ירשנו אל
Job 20:16 טז  ראש-פתנים יינק    תהרגהו לשון אפעה
Job 20:17 יז  אל-ירא בפלגות--    נהרי נחלי דבש וחמאה
Job 20:18 יח  משיב יגע ולא יבלע    כחיל תמורתו ולא יעלס
Job 20:19 יט  כי-רצץ עזב דלים    בית גזל ולא יבנהו
Job 20:20 כ  כי לא-ידע שלו בבטנו    בחמודו לא ימלט
Job 20:21 כא  אין-שריד לאכלו    על-כן לא-יחיל טובו
Job 20:22 כב  במלאות שפקו יצר לו    כל-יד עמל תבאנו
Job 20:23 כג  יהי למלא בטנו--ישלח-בו חרון אפו    וימטר עלימו בלחומו
Job 20:24 כד  יברח מנשק ברזל    תחלפהו קשת נחושה
Job 20:25 כה  שלף ויצא מגוה    וברק ממררתו יהלך עליו אמים
Job 20:26 כו  כל-חשך    טמון לצפוניו תאכלהו אש לא-נפח    ירע שריד באהלו
Job 20:27 כז  יגלו שמים עונו    וארץ מתקוממה לו
Job 20:28 כח  יגל יבול ביתו    נגרות ביום אפו
Job 20:29 כט  זה חלק-אדם רשע--מאלהים    ונחלת אמרו מאל