Allepo, Job, Chapter 19

Job 19:1 א                  ויען איוב ויאמר
Job 19:2 ב  עד-אנה תוגיון נפשי    ותדכאונני במלים
Job 19:3 ג  זה עשר פעמים תכלימוני    לא-תבשו תהכרו-לי
Job 19:4 ד  ואף-אמנם שגיתי    אתי תלין משוגתי
Job 19:5 ה  אם-אמנם עלי תגדילו    ותוכיחו עלי חרפתי
Job 19:6 ו  דעו-אפו כי-אלוה עותני    ומצודו עלי הקיף
Job 19:7 ז  הן אצעק חמס ולא אענה    אשוע ואין משפט
Job 19:8 ח  ארחי גדר ולא אעבור    ועל נתיבותי חשך ישים
Job 19:9 ט  כבודי מעלי הפשיט    ויסר עטרת ראשי
Job 19:10 י  יתצני סביב ואלך    ויסע כעץ תקותי
Job 19:11 יא  ויחר עלי אפו    ויחשבני לו כצריו
Job 19:12 יב  יחד יבאו גדודיו--ויסלו עלי דרכם    ויחנו סביב לאהלי
Job 19:13 יג  אחי מעלי הרחיק    וידעי אך-זרו ממני
Job 19:14 יד  חדלו קרובי    ומידעי שכחוני
Job 19:15 טו  גרי ביתי ואמהתי לזר תחשבני    נכרי הייתי בעיניהם
Job 19:16 טז  לעבדי קראתי ולא יענה    במו-פי אתחנן-לו
Job 19:17 יז  רוחי זרה לאשתי    וחנתי לבני בטני
Job 19:18 יח  גם-עוילים מאסו בי    אקומה וידברו-בי
Job 19:19 יט  תעבוני כל-מתי סודי    וזה-אהבתי נהפכו-בי
Job 19:20 כ  בעורי ובבשרי דבקה עצמי    ואתמלטה בעור שני
Job 19:21 כא  חנני חנני אתם רעי    כי יד-אלוה נגעה בי
Job 19:22 כב  למה תרדפני כמו-אל    ומבשרי לא תשבעו
Job 19:23 כג  מי-יתן אפו ויכתבון מלי    מי-יתן בספר ויחקו
Job 19:24 כד  בעט-ברזל ועפרת--    לעד בצור יחצבון
Job 19:25 כה  ואני ידעתי גאלי חי    ואחרון על-עפר יקום
Job 19:26 כו  ואחר עורי נקפו-זאת    ומבשרי אחזה אלוה
Job 19:27 כז  אשר אני אחזה-לי--ועיני ראו ולא-זר    כלו כליתי בחקי
Job 19:28 כח  כי תאמרו מה-נרדף-לו    ושרש דבר נמצא-בי
Job 19:29 כט  גורו לכם מפני-חרב--כי-חמה עונות חרב    למען תדעון שדין (שדון)