Job 18:1 א                  ויען בלדד השחי ויאמר
Job 18:2 ב  עד-אנה תשימון קנצי למלין    תבינו ואחר נדבר
Job 18:3 ג  מדוע נחשבנו כבהמה    נטמינו בעיניכם
Job 18:4 ד  טרף נפשו באפו    הלמענך תעזב ארץ ויעתק-צור ממקמו
Job 18:5 ה  גם אור רשעים ידעך    ולא-יגה שביב אשו
Job 18:6 ו  אור חשך באהלו    ונרו עליו ידעך
Job 18:7 ז  יצרו צעדי אונו    ותשליכהו עצתו
Job 18:8 ח  כי-שלח ברשת ברגליו    ועל-שבכה יתהלך
Job 18:9 ט  יאחז בעקב פח    יחזק עליו צמים
Job 18:10 י  טמון בארץ חבלו    ומלכדתו עלי נתיב
Job 18:11 יא  סביב בעתהו בלהות    והפיצהו לרגליו
Job 18:12 יב  יהי-רעב אנו    ואיד נכון לצלעו
Job 18:13 יג  יאכל בדי עורו    יאכל בדיו בכור מות
Job 18:14 יד  ינתק מאהלו מבטחו    ותצעדהו למלך בלהות
Job 18:15 טו  תשכון באהלו מבלי-לו    יזרה על-נוהו גפרית
Job 18:16 טז  מתחת שרשיו יבשו    וממעל ימל קצירו
Job 18:17 יז  זכרו-אבד מני-ארץ    ולא-שם לו על-פני-חוץ
Job 18:18 יח  יהדפהו מאור אל-חשך    ומתבל ינדהו
Job 18:19 יט  לא נין לו ולא-נכד בעמו    ואין שריד במגוריו
Job 18:20 כ  על-יומו נשמו אחרנים    וקדמנים אחזו שער
Job 18:21 כא  אך-אלה משכנות עול    וזה מקום לא-ידע-אל