Allepo, Job, Chapter 17

Job 17:1 א  רוחי חבלה ימי נזעכו    קברים לי
Job 17:2 ב  אם-לא התלים עמדי    ובהמרותם תלן עיני
Job 17:3 ג  שימה-נא ערבני עמך    מי הוא לידי יתקע
Job 17:4 ד  כי-לבם צפנת משכל    על-כן לא תרמם
Job 17:5 ה  לחלק יגיד רעים    ועיני בניו תכלנה
Job 17:6 ו  והציגני למשל עמים    ותפת לפנים אהיה
Job 17:7 ז  ותכה מכעש עיני    ויצרי כצל כלם
Job 17:8 ח  ישמו ישרים על-זאת    ונקי על-חנף יתערר
Job 17:9 ט  ויאחז צדיק דרכו    וטהר-ידים יסיף אמץ
Job 17:10 י  ואולם--כלם תשבו ובאו נא    ולא-אמצא בכם חכם
Job 17:11 יא  ימי עברו זמתי נתקו--    מורשי לבבי
Job 17:12 יב  לילה ליום ישימו    אור קרוב מפני-חשך
Job 17:13 יג  אם-אקוה שאול ביתי    בחשך רפדתי יצועי
Job 17:14 יד  לשחת קראתי אבי אתה    אמי ואחתי לרמה
Job 17:15 טו  ואיה אפו תקותי    ותקותי מי ישורנה
Job 17:16 טז  בדי שאל תרדנה    אם-יחד על-עפר נחת